आईसीटी समाचार
ट्विटर अहिलेसम्म पूर्ण रूपमा खुला प्लेटफर्म थियो, अर्थात्, ट्विटरमा अकाउन्ट नभएका मानिसहरूले पनि सेयर गरिएको ट्वीट वा महत्त्वपूर्ण ट्वीटहरू हेर्न सक्थे । यसका लागि उनीहरूलाई लगइन वा अकाउन्ट बनाउन आवश्यक पर्दैन थियो । तर अब मस्कले यसलाई परिवर्तन गरेका छन् र ट्विटरको लागि क्याटेगरी सीमा तोकेका छन् ।
पैसा तिरेर नीलो टिक किन्ने व्यक्तिले एक दिनमा अधिकतम ट्वीट पढ्न सक्नेछन्, निःशुल्क प्रयोगकर्ताले केही ट्वीट मात्रै हेर्न सक्नेछन् ।
मस्कको ट्वीटको अनुसार भुक्तान गरिएको अर्थात ब्लू टिक प्रयोगकर्ताहरूले एक दिनमा ६ हजार पोष्टहरू हेर्न सक्ने बताएका छन् । त्यसैगरी अप्रमाणित अकाउन्ट वा ब्लु टिक नभएको अकाउन्टले ६०० र ३० दिनभन्दा कम समय भएका नयाँ अप्रमाणित प्रयोगकर्ताले ३०० पोष्ट मात्र हेर्न सक्नेछन् । यो सीमा ट्विटरमा खाता हुने व्यक्तिहरूको लागि मात्रै हो । ट्विटरमा खाता नभएका व्यक्तिहरूले प्लेटफर्मसँग सम्बन्धित कुनै पनि कुरा पहुँच गर्न सक्ने छैनन् ।
यो ट्विटको केही समयपछि मस्कले ब्लु टिक प्रयोगकर्ताका लागि पोस्ट पढ्ने सीमा चाँडै नै बढाएर ८,०००, अप्रमाणित वा ब्लु टिक नभएका अकाउन्टका लागि ८०० र नयाँ अप्रमाणित प्रयोगकर्ताका लागि ४०० पु¥याउने बताएका छन् ।
एलन मस्कले केही घण्टापछि अर्को ट्वीट गर्दै अब ब्लु टिक प्रयोगकर्ताले एक दिनमा १०,००० पोष्टहरू, अप्रमाणित खाताहरूले १,००० र नयाँ अप्रमाणित प्रयोगकर्ताहरूले एक दिनमा ५०० पोस्ट पढ्न सक्ने बताएका छन् । कम्पनीको पछिल्लो अपडेट अहिले लागू भएको छ । यदि कुनै प्रयोगकर्ताले निश्चित सीमा नाघ्यो भने, उसले ट्विटरसँग सम्बन्धित कुनै पनि सामग्री हेर्न सक्नेछैन् ।
मस्कले डाटा चोरी रोक्नको लागि यो कदम उठाएका हुन् । अहिलेसम्म जो कोहीले प्लेटफर्ममा पहुँच गर्न सक्थे, जसका कारण ट्विटरको डाटा धेरै ठाउँमा फैलिएको थियो । एआई टुल्स आएपछि डेटा चोरी झनै तिब्र गतिमा बढ्दै गएपछि मस्कले यो महत्वपूर्ण निर्णय लिएका हुन् ।
