आईसीटी समाचार
सुनसरीको इटहरीमा पहिलो पटक सूचना तथा सञ्चार प्रविधि विशेष मेला बुधबारदेखि सुरु भएको छ । २३ गतेदेखि सुरु भएको हिक भिजन क्यान इन्फोटेक २०१८ मा ८० भन्दा बढी कम्पनीका १ सय १५ स्टल रहेका छन् । काठमाडौँमा २४औँ संस्करणको इन्फोटेकपछि चितवन, बुटवल र पोखरापश्चात् इटहरीमा इन्फोटेक आयोजना भइरहेको हो ।
सुनसरीमा तेस्रो र इटहरीमा पहिलो पटक भइरहेको इन्फोटेकमा कम्प्युटर प्रविधि, स्मार्ट डिभाइस, सेक्युरिटी प्रडक्ट, आइटी शिक्षा, सफ्टवेयर, एप्लिकेशन र ट्रेनिङ कोर्सहरुको बारेमा विभिन्न कम्पनीहरुले प्रदर्शनी गरेका छन् । सूचना प्रविधिले व्यापकता पाइरहेको अवस्थामा प्रडक्ट र सेवाको प्रवद्धन तथा सचेतनाको लागि प्रदेशस्तरिय मेला आयोजना गरिएको क्यान महासंघ सुनसरीका अध्यक्ष बलराम भण्डारीले बताए ।
मेलामा आकर्षकको रूपमा विश्वकै सानो मोबाइल प्रदर्शनमा राखिने भएको छ । योसँगै अन्य आकर्षक प्रविधिहरु पनि हुने आयोजकले जानकारी दिएको छ । सहभागी कम्पनीहरुले आफ्ना प्रडक्ट र सेवामा आकर्षक छुट र अफरहरु सार्वजनिक गरिरहेका छन् । अवलोकनकर्तालाई प्रडक्टका बारेमा जानकारी दिने र सेल्सभन्दा पनि ब्रान्डिङमा फोकस रहने सहभागी बारकोड नेपालका सुरेश महर्जनले बताए ।
क्यान सुनसरीले केही वर्षपछि इटहरीमा गरेको इन्फोटेकले प्रदेशका सबै सर्वसाधारण र कम्पनीहरुलाई आकर्षित गर्ने विश्वास लिएको क्यान महासंघका केन्द्रीय महासचिव रञ्जित पोदारले बताए ।
इटहरी स्थित जनता निमाविको प्राङ्गणमा हुने मेलामा टाइटल स्पोन्सर हिक भिजन एसोसिएट स्पोन्सर डिजिकम रहेको छ भने डाइमन्ड स्पोन्सर क्यानोन, एचएफसी रहेका छन् । प्ल्याटनियम स्पोनसरहरुमा बारकोड नेपाल, इटहरी इन्टरनेश्नल कलेज र टिपी लिंक रहेका छन् ।
गोल्ड स्पोन्सरमा ओली एण्ड एसोसिएटस, नेटिस, एप्सर सिल्भर स्पोन्सर टेक्नोस, एनपी एभी टिकट स्पोन्सर ई–स्क्यान र अफिसियल स्पोन्सरमा सनराइज बैंक, प्यारागन आइटी, प्रेडेन्सियल इन्स्योरेन्स, शैलुङ मेडिकल, वाई जोन, कस्तुरी एकेडमी, सुस्मा इन्जिनियरिङ कलेज, इसेवा, एक्सपर्ट एजुकेसन एण्ड भिसा सर्भिस, कुनाल स्टोर, ग्राफिका इन्टरनेशनललगायत रहेका छन् । अफिसियल मिडिया लिभिङ विथ आइसिटीले तीन ओटासम्म विशेष संस्करण प्रकाशन गर्ने छ ।
