आईसीटी समाचार
नेपाल दुरसंचार प्राधिकरणले राजस्व भुक्तान नगरी अवैध रुपमा नेपाली बजारमा भित्रिएका मोबाइलहरु पत्ता लगाउन 'मोबाइल डिभाइस म्यानेजमेन्ट सिस्टम( MDMS) ' लागू गर्ने भएको छ ।
यो सिस्टम अन्तर्गत कानुनी रुपमा भित्रिएका मोबाइलहरुको यथार्थ विवरण राखिने भएका कारण प्राधिकरणले यो प्रणाली मार्फत अवैध मोबाइलको पहिचान गर्ने भएको हो ।
प्राधिकरणका अनुसार एमडीएमएस प्रणालीमा मोबाइलको आइएमआइ नम्बरको सेतो,खैरो र कालो सूची तयार हुनेछ ।यस्तो सूची आयातकर्ता,भन्सार कार्यालय,मोबाइल सेवा प्रदायक,सर्वसाधारण तथा प्राधिकरणलाई सहजै उपलब्ध हुनेछ ।
यसबाट प्रयोगमा रहेका वास्तविक मोबाइल पत्ता लागाउने र अवैध मोबाइल छुट्याउन सहयोग पुग्ने प्राधिकरणले जनाएको छ ।
एमडीएमएस प्रणाली संचालनमा आएसँगै हराएका र चोरी भएका मोबाइल पनि सजिलै पत्ता लगाउन सकिने प्राधिकरणले जनाएको छ । सबै मोबाइलको आइएमआई विवरण राखिने यस प्रणालीमा हुने सेतो सूचीमा नेपालमा विक्री र प्रयोग गर्न सकिने मोबाइल,
कालोसूचीमा हराएका र चोरी भएका तथा बिक्रि र प्रयोग गर्न नसकिने मोबाइल र खैरो सूचीमा दर्ता गरेर प्रयोगमा ल्याउन सकिने मोबाइलको विवरण राखिने छ ।
यस प्रणालीले अवैध इन्टरनेट गेटवे प्रयोग गरी नेपालमा टेलिफोन कल भित्र्याउन प्रयोग हुने सिम बक्सको प्रयोग पहिचान गरी त्यसलाई निस्क्रिय बनाउँछ ।
यस्तै व्यक्तिगत रुपमा विदेशबाट ल्याएको मोबाइल प्राधिकरणले तोकेको संख्या अनुसार एमडीएमएसमा प्रणालीमा दर्ता गर्न सकिन्छ ।प्राधिकरणले यसरि विदेशबाट कति मात्रामा ल्याउन सकिने भन्ने परिमाण बार्षिक रुपमा तोक्न सक्छ ।
मोबाइलको आईएमआई नम्बर लगइन गरेपछि एमडीएमएस प्रणालीले उक्त मोबाइल सेतो अथवा कालो सूचीमा छ त्यसको जानकारी उपलब्ध गराउनेछ ।
यदि मोबाइल उक्त नम्बरसूचीमा समावेश नभए उक्त मोबाइल अवैध रुपमा अथवा चोरीको रुपमा भित्रिएको पत्ता लाग्नेछ । (गोरखापत्र )
