आईसीटी समाचार
काठमाडौं । राष्ट्रिय युवा परिषद्ले प्रदेशस्तरीय स्टार्टअप व्यवसाय प्रदर्शनीका लागि आवेदन दिने म्याद थप गरेको छ । परिषद्ले यसअघि जारी गरेको सूचनाको म्याद बढाउँदै थप समय उपलब्ध गराएको हो ।
युवा, श्रम तथा रोजगार मन्त्रालय अन्तर्गतको परिषद्ले आर्थिक वर्ष २०८२/८३ को स्वीकृत वार्षिक कार्यक्रमअनुसार युवाद्वारा सञ्चालित सूचना प्रविधि तथा स्टार्टअप व्यवसाय प्रवर्द्धन गर्ने उद्देश्यले प्रदर्शनी आयोजना गर्न लागेको हो ।
प्रदर्शनी सुदूरपश्चिम प्रदेशको धनगढी, लुम्बिनी प्रदेशको बुटवल, बागमती प्रदेशको हेटौंडा र कोशी प्रदेशको विराटनगरमा आयोजना गरिनेछ । प्रत्येक प्रदेशबाट १५/१५ वटा सूचना प्रविधि तथा स्टार्टअप व्यवसाय छनोट गरी सहभागी गराइनेछ ।
परिषद्का अनुसार इच्छुक युवा उद्यमीले अब थपिएको म्याद अनुसार २०८३ जेठ १४ गते राति १२ बजेसम्म अनलाइन पोर्टलमार्फत आवेदन दिन सक्नेछन् । आवेदन दिन व्यवसाय दर्ता गरी सञ्चालनमा रहेको हुनुपर्नेछ भने उमेर १६ वर्ष पूरा भई ४० वर्ष ननाघेको हुनुपर्नेछ ।
छनोट भएका व्यवसायलाई स्टल व्यवस्थापनका लागि प्रति स्टल रु. १० हजार उपलब्ध गराइनेछ । साथै प्रदर्शनीमा उत्कृष्ट हुने व्यवसायलाई प्रथम, द्वितीय, तृतीय र सान्त्वना पुरस्कारस्वरूप क्रमशः रु. ४० हजार, रु. ३० हजार, रु. २० हजार र दुई जनालाई रु. १०/१० हजार प्रदान गरिनेछ ।
आवेदनका लागि व्यवसाय दर्ता प्रमाणपत्र, नागरिकताको प्रमाणपत्र, पछिल्लो तीन महिनाको बैंक स्टेटमेन्ट, अडिट रिपोर्ट, कर चुक्ता प्रमाणपत्र तथा व्यवसायसम्बन्धी सात मिनेटको भिडियो आवश्यक पर्नेछ । परिषद्ले योग्य युवा उद्यमीलाई अवसरको उपयोग गर्दै नवप्रवर्तनशील व्यवसाय प्रस्तुत गर्न आग्रह गरेको छ ।
