आईसीटी समाचार
काठमाडौं । डिजिटल नेपाल कन्क्लेभ २०२६ अन्तर्गत आयोजित ‘Building the Foundations for Resilient Digital Governance’ विषयक पहिलो विषयगत प्यानलमा नेपालको डिजिटल भविष्यका लागि बलियो डिजिटल शासन प्रणाली, डेटा सुरक्षा, रणनीतिक नीति र सहकार्यात्मक नवप्रवर्तनको आवश्यकताबारे छलफल भएको छ ।
प्यानलमा प्रतिनिधिसभा सदस्य धर्मराज केसी, नेपाल नगरपालिका संघकी सचिव तथा फिक्कल गाउँपालिकाकी अध्यक्ष पार्वती सुनुवार, राष्ट्रिय विपद् जोखिम न्यूनीकरण तथा व्यवस्थापन प्राधिकरणका प्रमुख कार्यकारी अधिकृत डा. धर्मराज उप्रेती, विदुर नगरपालिकाकी उपप्रमुख प्रभा बोगटी, सूचना प्रविधि विभागका सहसचिव सुभाष ढकाल र आईसीटी विज्ञ तथा पूर्व एचएलसीआईटी उपाध्यक्ष मनोहर भट्टराई सहभागी थिए ।
हेमपाल श्रेष्ठले सहजीकरण गरेको प्यानलमा नेपालको डिजिटल शासनलाई थप बलियो, सुरक्षित र प्रभावकारी बनाउन आवश्यक नीति, डेटा सुरक्षा तथा विभिन्न निकायबीचको सहकार्यका विषयमा विचार आदानप्रदान गरिएको थियो ।
छलफलमा डिजिटल शासनको बलियो आधार निर्माण गर्दै प्रविधि र नवप्रवर्तनलाई प्रभावकारी रूपमा उपयोग गर्नुपर्ने तथा डिजिटल भविष्यका लागि सरकार, निजी क्षेत्र र अन्य सरोकारवालाबीच सहकार्य आवश्यक रहेकोमा जोड दिइएको थियो ।
