आईसीटी समाचार
ह्वाट्सएपलाई वेब ब्राउजरमार्फत प्रयोग गर्ने प्रयोगकर्ताहरूका लागि खुशीको खबर छ। कम्पनीले वेब प्रयोगकर्ताका लागि समूह भ्वाइस र भिडियो कलिङ सुविधाको समर्थन ल्याउने तयारी गरिरहेको छ। यो सुविधा आएपछि अब समूहमा कल गर्न मोबाइल फोनको आवश्यकता पर्नेछैन।
यसअघि ह्वाट्सएपले वेबका लागि भ्वाइस र भिडियो कलिङ सुविधा ल्याउने घोषणा गरेको थियो। अब भने सोही सुविधालाई विस्तार गर्दै समूह कलिङ सपोर्ट थप्न लागिएको हो। यस अपग्रेडपछि प्रयोगकर्ताले कुनै छुट्टै एप इन्स्टल नगरीकनै सिधै वेब ब्राउजरबाट समूह कल गर्न सक्नेछन्।
ह्वाट्सएप वेबमा कलिङ सुविधा उपलब्ध भएपछि विशेषगरी आफ्नै नभएको कम्प्युटर प्रयोग गरेर काम गर्ने प्रयोगकर्तालाई ठूलो फाइदा पुग्नेछ। साथै ल्यापटप वा पीसीमा डेस्कटप एप इन्स्टल गर्नुपर्ने झन्झट पनि हट्नेछ। प्रयोगकर्ताले वेबमै बसेर कल गर्न सक्ने मात्र होइन, कुन–कुन प्रकारका कल सूचना चाहिन्छ भन्ने कुरामा पनि नियन्त्रण गर्न सक्नेछन्।
हालै सार्वजनिक भएका रिपोर्टअनुसार कम्पनीले समूह च्याटका लागि भ्वाइस र भिडियो कलिङ सुविधा विकास गरिरहेको छ। परीक्षण चरणमा रहेको यस सुविधाको स्क्रिनसटसमेत बाहिर आएको छ, जसले प्रयोगकर्ताले वेब क्लाइन्टबाटै सिधै समूह कल गर्न सक्ने संकेत गरेको छ। उल्लेखनीय कुरा के छ भने गत वर्ष पनि यस सुविधाको प्रारम्भिक झलक देखिएको थियो, तर त्यस समयमा समूह कलिङ सपोर्ट उपलब्ध थिएन।
रिपोर्टअनुसार ह्वाट्सएप वेबमार्फत गरिने कलहरूमा मोबाइल एपजस्तै केही सीमाहरू हुन सक्छन्। समूह कलिङमा अधिकतम ३२ जनासम्म सहभागी जोड्न सकिने सम्भावना रहेको बताइएको छ। यद्यपि सार्वजनिक रूपमा सुविधा सुरु हुँदा यो संख्या परिवर्तन हुन सक्नेछ। प्रारम्भिक चरणमा ८ वा १६ जनासम्म मात्र समूह कलिङको समर्थन उपलब्ध गराइने अनुमान गरिएको छ।
ह्वाट्सएप वेबमा समूह कलिङ सुविधा सुरु भएसँगै ब्राउजरमै आधारित सञ्चार अझ सहज र प्रभावकारी हुने अपेक्षा गरिएको छ।
