नयाँ स्मार्टफोन किन्दै हुनुहुन्छ भने यी आठ पक्षलाई दिनुहोस् विशेष ध्यान

स्मार्टफोनको बजार अत्यन्त प्रतिस्पर्धात्मक बन्दै गएको छ । यस्तो अवस्थामा स्मार्टफोन खरिद गर्दा तपाईँले केही महत्वपूर्ण कुराहरूमा ध्यान दिनुपर्छ ताकि तपाईँ आफ्ना आवश्यकता र बजेट अनुसार सही डिभाइसको छनोट गर्न सक्नुहुनेछ । यसका लागि ध्यान दिनुपर्ने केही महत्वपूर्ण पक्ष । 

प्रोसेसर र प्रदर्शनः प्रोसेसर फोनको गति र मल्टीटास्किङ क्षमतालाई निर्धारण गर्दछ । यदि तपाईँ गेमिङ वा हेवी एप्लिकेसनहरूको प्रयोग गर्नुहुन्छ भने, उच्च–स्तरको प्रोसेसर भएको फोनको छनोट गर्नुपर्छ ।

र्याम र स्टोरेजः आजको मितिमा तपाईँले यस्तो फोन खरिद गर्नुपर्छ जसमा कम्तिमा ६ जीबी र्याम र १२८ जीबी स्टोरेज छ, किनकि यसले तपाईँको फोनको प्रदर्शन र डेटा भण्डारण क्षमतालाई असर गर्छ । यदि तपाई धेरै एप्लिकेसन र फाइलहरूको प्रयोग गर्नुहुन्छ भने बढी स्टोरेज र र्याम भएको फोन छनोट गर्नुहोस् ।

क्यामेरा क्वालिटीः क्यामेरा आजकल धेरै नै महत्वपूर्ण भएको छ । यदि तपाईँलाई फोटोग्राफी मनपर्छ भने, क्यामेरा क्वालिटी, लेन्स र मेगापिक्सलमा ध्यान दिनुहोस् । मल्टिपल क्यामेरा सेटअप (वाइड–एङ्गल, म्याक्रो, टेलिफोटो) पनि राम्रो विकल्प हुन सक्छ ।

ब्याट्री लाइफः फोन खरिद गर्दा ब्याट्रीको क्षमता र फास्ट चार्जिङ सपोर्टमा ध्यान दिनुहोस् । यदि तपाईँ दिनभर फोन प्रयोग गर्नुहुन्छ भने कम्तिमा ४००० एमएएच भन्दा बढी ब्याट्री क्षमता भएको फोन छनोट गर्नुहोस् ।

डिस्प्ले क्वालिटीः डिस्प्लेको रिजोल्युसन (फूल एचडी, फोरके), स्क्रिन साइज र प्रकार (एमोलेड, ओएलईडी) महत्त्वपूर्ण छन् । विशेष गरी यदि तपाईँ ओटीटीको शौकिन हुनुहुन्छ भने यसलाई विशेष ध्यान दिनुहोस् ।

बिल्ड क्वालिटी र डिजाइनः फोनको डिजाइन, सामग्री (ग्लास, मेटल, प्लास्टिक) र यसको फीलिङ पनि ध्यान दिने कुराहरू हुन् । साथै, वाटरप्रूफिङ (आईपी रेटिङ) पनि आवश्यक छ ।

फाइभजी र कनेक्टिविटीः फाइभजी नेटवर्कको युग चलिरहेको छ । यस्तो अवस्थामा फाइभजी सपोर्ट भएको फोनलाई प्राथमिकता दिनुहोस् । अन्य कनेक्टिविटी विकल्पहरू जस्तै ब्लुटुथ ५.०, एनएफसी, र वाई–फाई ६ पनि ध्यानमा राख्नुहोस् ।

सफ्टवेयर अपडेट्स र सुरक्षाः फोनको कम्पनीले कति छिटो र कति पटक सफ्टवेयर अपडेट दिन्छन्, यसलाई पनि चेक गर्नुहोस् । सुरक्षा प्याचेज पनि जाँच गर्नुहोस् ।