आईसीटी समाचार
संघीय निजामती सेवामा अब ११ वटा सेवा समूह रहने भएको छ। राज्य व्यवस्था तथा सुशासन समितिले प्रस्तावित निजामती सेवा विधेयकको दफा ५ सर्वसम्मत रूपमा पारित गरेपछि यो निर्णय आएको हो ।
हाल निजामती सेवामा १० वटा समूह छन्, तर नेपाल सूचना प्रविधि सेवा समूह थपिएसँगै अब सेवा समूहको संख्या ११ पुगेको हो।
यसअघि सांसदहरूले संसद् सेवा र स्वास्थ्य सेवा पनि निजामती सेवाभित्र राख्नुपर्ने प्रस्ताव राखेका थिए। तर, प्रधानमन्त्री तथा मन्त्रिपरिषद् कार्यालय तथा कानुन, न्याय तथा संसदीय मामिला मन्त्रालयले यी सेवा विशिष्ट प्रकृतिका भएकाले छुट्टै राख्नुपर्ने तर्क गरे । संसद् सेवाको स्वायत्ततालाई समेत ध्यानमा राख्दै यसलाई छुट्टै राखिएको बताइएको छ।
यद्यपि, स्वास्थ्य सेवा र संसद् सेवाबारे पुनः छलफल गरिने समितिका सभापति रामहरि खतिवडाले जानकारी दिए।
नयाँ संरचनाअनुसार संघीय निजामती सेवाका ११ समूह यस प्रकार रहनेछन्:
- नेपाल प्रशासन सेवा
- नेपाल लेखापरीक्षण सेवा
- नेपाल वन सेवा
- नेपाल विविध सेवा
- नेपाल शिक्षा सेवा
- नेपाल आर्थिक योजना तथा तथ्यांक सेवा
- नेपाल इन्जिनियरिङ सेवा
- नेपाल कृषि सेवा
- नेपाल न्याय सेवा
- नेपाल परराष्ट्र सेवा
- नेपाल सूचना प्रविधि सेवा
समितिले यसअघि नै दफा १, ३, र ४ पारित गरिसकेको छ। १४७ दफाहरू रहेको प्रस्तावित विधेयकमा बुधबार दफा ५ मात्रै पारित भएको हो। अब बाँकी दफाहरूमा छलफल हुने र आवश्यक परिमार्जनपछि विधेयकलाई संसद्मा टेबल गरिनेछ।
