आईसीटी समाचार
काठमाडौं । अध्यागमन विभागले नेपाली नागरिकको विदेश भ्रमणसम्बन्धी विवरण अब नागरिक एपमार्फत नै प्राप्त गर्न सकिने व्यवस्था मिलाएको छ ।
विभागले शुक्रबार प्रेस विज्ञप्ति जारी गर्दै सेवा थप सुरक्षित, व्यवस्थित र प्रविधिमैत्री बनाउने उद्देश्यले अन्तर्राष्ट्रिय आगमन तथा प्रस्थानसम्बन्धी विवरण (भ्रमण विवरण) नागरिक एपमार्फत उपलब्ध गराउने व्यवस्था गरिएको जनाएको हो ।
नयाँ व्यवस्था लागू भएसँगै भ्रमण विवरण लिन सेवाग्राहीले विभागमा भौतिक रूपमा उपस्थित भएर निवेदन दिनुपर्ने बाध्यता हटेको विभागले जनाएको छ । नागरिक एपमा सम्बन्धित व्यक्तिको राहदानी विवरणसमेत देखिने भएकाले व्यक्तिगत विवरण सुरक्षित रहने विभागको भनाइ छ ।
यसअघि भौतिक रूपमा निवेदन दिँदा प्रक्रियागत झन्झट, विवरण प्राप्त गर्न लाग्ने समय तथा विभागको कार्यबोझ बढ्ने समस्या रहेको विभागले जनाएको छ । नयाँ व्यवस्थाले सेवाग्राहीको समय र लागत दुवै बचत हुने विभागका निर्देशक एवं प्रवक्ता टीकाराम ढकालले बताए ।
उनका अनुसार नागरिक एपमार्फत प्राप्त भ्रमण विवरणलाई विभिन्न व्यक्ति तथा सङ्घसंस्थाले आधिकारिक स्रोतका रूपमा समेत प्रयोग गर्न सक्नेछन् । विभागले प्रविधिको प्रयोगमार्फत सेवा प्रवाहलाई सहज, सुरक्षित र प्रभावकारी बनाउने उद्देश्यअनुसार यस्तो व्यवस्था लागू गरिएको जनाएको छ ।
