आईसीटी समाचार
च्याटजीपीटी निर्माण गरेर आर्टिफिसियल इन्टेलिजेन्स (कृत्रिम बुद्धिमत्ता) को क्षेत्रमा क्रान्ति ल्याइसकेपछि, ओपनएआई अब एउटा ठूलो योजना बनाउँदैछ । रिपोर्टका अनुसार, कम्पनी वेब ब्राउजर क्षेत्रमा विकल्प खोजिरहेको छ । भनिएको छ कि कम्पनीले च्याटजीपीटीको भाषासम्बन्धी क्षमता समावेश हुने वेब ब्राउजर प्रोटोटाइप र नयाँ उत्पादन डिजाइनको खोजी गरिरहेको छ ।
रिपोर्टअनुसार, ओपनएआई च्याटजीपीटीसँग एकीकृत वेब ब्राउजर निर्माण गर्ने सोचमा छ । कम्पनीले प्राइसलाइन, इभेन्टब्राइट, रेडफिन र कोंडे नास्टजस्ता विकासकर्तासँग कृत्रिम बुद्धिमत्ता (एआई) एकीकृत सर्च टूलमा छलफल गरेको उल्लेख छ । छलफलका क्रममा केही प्रोटोटाइप र उत्पादन डिजाइन पनि देखिएका छन्, जसले नयाँ ब्राउजर निर्माणको संकेत गर्दछ ।
ओपनएआईले पहिले नै “सर्चजीपीटी“ नामको नयाँ खोज सुविधाको प्रोटोटाइप परीक्षण गरिसकेको छ । यो प्रोटोटाइप ओपनएआई मोडेलको क्षमता र वेबको जानकारीलाई संयोजन गरी प्रयोगकर्तालाई छिटो र स्पष्ट जानकारी विश्वसनीय स्रोतबाट उपलब्ध गराउने उद्देश्यले डिजाइन गरिएको हो ।
रिपोर्टले बताउँछ कि ओपनएआईको नयाँ ब्राउजर प्रोटोटाइप तयारी चरणमा छ, तर अझै पूर्ण रूपमा तयार छैन् । तर, यदि कम्पनीले ब्राउजर क्षेत्रमा प्रवेश ग¥यो भने, यो गुगलको क्रोम ब्राउजरसँग प्रत्यक्ष प्रतिस्पर्धामा हुनेछ । सर्चजीपीटीका फिचरहरूका कारण ओपनएआईको ब्राउजरले धेरै प्रयोगकर्तालाई आकर्षित गर्ने क्षमता राख्नेछ ।
यसैबीच, गुगल पनि आफ्नो कृत्रिम बुद्धिमत्ता च्याटबोट खेललाई बलियो बनाउन “जेमिनाई“ प्रस्तुत गर्दैछ र यसलाई विभिन्न उत्पादनहरूमा समायोजन गरिरहेको छ ।
अहिले गुगलका लागि चिन्ताको विषय भनेको संयुक्त राज्य अमेरिकाको न्याय विभागले क्रोम ब्राउजर बेच्न सिफारिश गरेको हो । यसले गुगललाई चुनौती दिने सम्भावना रहेको छ । यस्तो अवस्थामा ओपनएआईका लागि यो राम्रो अवसर बन्न सक्छ । अहिले ब्राउजर क्षेत्रमा गुगलको प्रभुत्व छ, तर भविष्यमा ओपनएआईको ब्राउजर आएपछि यो स्थितिमा परिवर्तन हुन सक्छ ।
