आईसीटी समाचार
काठमाडौं । बाढी र पहिरोका कारण सडक, पुल तथा परम्परागत सञ्चार संरचना प्रभावित भइरहेका बेला नेपालमा उद्धार तथा राहत कार्यका लागि स्याटलाइट इन्टरनेट उपलब्ध गराउने प्रस्ताव आएको छ ।
अमेरिकी स्याटलाइट इन्टरनेट कम्पनी स्टारलिंकले नेपाल र तिब्बत सीमा क्षेत्रमा आएको विनाशकारी बाढीबाट प्रभावित क्षेत्रमा सञ्चार सहज बनाउन नेपाल सरकार तथा मानवीय सहायता संस्थालाई नि:शुल्क सेवा उपलब्ध गराउने प्रस्ताव गरेको हो ।
कम्पनीले शनिबार सामाजिक सञ्जाल ‘एक्स’मार्फत आफ्नो सेवा विपद् व्यवस्थापनमा प्रयोग गर्न तयार रहेको जानकारी दिएको छ । नेपाल सरकारबाट आवश्यक अनुमति प्राप्त हुना साथ प्रभावित क्षेत्रमा प्रयोग गर्न सकिने उपकरण (किट्स) उपलब्ध गराउने र सेवा नि:शुल्क सञ्चालन गर्ने स्टारलिंकले जनाएको छ ।
सडक र मोबाइल नेटवर्क अवरुद्ध हुँदा वैकल्पिक सञ्चार
बाढी र पहिरोका कारण कतिपय स्थानमा सडक तथा पुलमा क्षति पुगेको छ भने मोबाइल टावर र नियमित सञ्चार सेवा पनि प्रभावित हुने जोखिम बढेको छ । यस्तो अवस्थामा स्याटलाइटमा आधारित इन्टरनेटले भौतिक सञ्चार पूर्वाधारमा निर्भर नभई सम्पर्क कायम राख्न सहयोग गर्न सक्छ ।
स्टारलिंकका अनुसार विपद्का बेला सडक तथा सञ्चार नेटवर्क विच्छेद हुँदा यसको सेवा उद्धार टोली, स्वास्थ्यकर्मी र आफ्ना आफन्तको खोजीमा रहेका परिवारका लागि उपयोगी हुँदै आएको छ ।
कम्पनीले आपत्कालीन अवस्थामा सञ्चार सम्पर्क कायम राख्न स्याटलाइट इन्टरनेटको भूमिका महत्वपूर्ण हुने उल्लेख गर्दै नेपालमा पनि आवश्यक परे तत्काल सहयोग गर्न तयार रहेको जनाएको हो ।
सरकारको अनुमतिपछि उपकरण उपलब्ध गराउने
स्टारलिंकले नेपालमा सेवा उपलब्ध गराउन आवश्यक उपकरण तत्काल उपलब्ध गराउन सक्ने जनाएको छ । त्यसका लागि भने नेपाल सरकारबाट अनुमति आवश्यक पर्नेछ । कम्पनीले सरकार तथा मानवीय सहायता क्षेत्रमा काम गरिरहेका संस्थाहरूसँग समन्वय गरेर प्रभावित क्षेत्रमा सेवा पुर्याउने इच्छा व्यक्त गरेको छ ।
