आईसीटी समाचार
भिरिञ्ची कलेजमा बिहीबारदेखि ३ दिने आईसीटी मेला ४.० सुरू भएको छ । पुस १२ गतेदेखि सुरू भएको मेला पुस १४ गते शनिबारसम्म सञ्चालन हुनेछ । बिहीबार ललितपुर महानगरपालिकाका मेयर तथा आईसिटी मेलाका प्रमुख अतिथि चिरीबाबु महर्जन आईसीटी मेलाको उद्घाटन गरेका थिए ।
नेपालमा आईसीटी क्षेत्रको प्रवर्द्धन गर्न र युवा पुस्तालाई देशमै सम्भावना देखाउन आईसीटी मेला आयोजना गरेको भिरिञ्ची कलेजका सीईओ आकाश सिम्खडाले बताए ।
यस्तै विद्यार्थीका परियोजनाहरू अवलोकन गर्दै ललितपुर महानगरपालिकाका मेयर चिरीबाबु महर्जनले भिरिञ्ची कलेजको काम प्रशंसनीय भएको बताए । ‘तपाईहरूले एकदमै राम्रो काम गरिरहनु भएको छ । सबैलाई बधाई छ,’ प्रमुख अतिथि समेत रहेका मेयर महर्जनले भने, ‘तपाईहरूले बनाउनु भएका प्रोजेक्टलाई महानगरका सेवासँग कसरी जोड्न सकिन्छ ? आउनुस्, त्यसका लागि ललितपुर महानगर सहकार्य गर्न तयार छ । हामी रातो कार्पेटमा स्वागत गर्न तयार छौं ।’
निःशुल्क अवलोकन गर्न सकिने आईसीटी मेला भिरिञ्ची कलेजले विगत ४ वर्षदेखि आयोजना गर्दै आएको छ । यसमा भिरिञ्ची कलेजका विद्यार्थीले बनाएका प्रोजेक्टलाई प्रदर्शनीमा राखिएको छ ।
मेलामा एआई, रोबोटिक्स र आईओटीका परियोजनामा फोकस गरिएको छ ।
यस वर्ष मानवीय रोबोट, रोबो सकर, ग्रीन हाउस, टार्गेट सुटिङ, सनेक सर्भिलेन्स रोबोट, सोलार ट्रयाकिङ, ट्राफिक लाइट र फेस रिकग्निसन सिस्टम लगायतका प्रोजेक्ट प्रदर्शनीमा रहेका छन् ।
