आइसिटी समाचार
बैंक तथा वित्तीय संस्थासम्बन्धी ऐन, २०७३ लाई संशोधन गर्न बनेको विधेयकमा डिजिटल बैंकले पनि बैंकिङ तथा वित्तीय कारोबार गर्न सक्ने व्यवस्था प्रस्ताव गरिएको छ ।
प्रतिनिधि सभामा दर्ता भएको विधेयकमा डिजिटल बैंकले बैंकिङ तथा वित्तीय कारोबार गर्न सक्ने र नेपाल राष्ट्र बैंकले जारी गरेको डिजिटल मुद्रालाई समेत मान्यता दिने प्रस्ताव गरिएको हो ।
डिजिटल बैंकले पनि राष्ट्र बैंकले तोके अनुसार निक्षेप लिने, कर्जा प्रवाह गर्ने समेतका बैंकिङ तथा वित्तीय कारोबार गर्न सक्ने संशोधनमा उल्लेख छ ।
संशोधनमा डिजिटल मुद्रा स्वीकार गर्ने र भुक्तानी दिने व्यवस्था थप गरिएको छ । डिजिटल मुद्राको प्रयोग र प्रवर्द्धनका लागि यो नयाँ व्यवस्था प्रस्ताव भएको हो ।
यस्तै यसमा विद्युतीय माध्यमबाट जम्मा गरेको रकमलाई कानुनी वैधता दिन पनि प्रस्ताव गरिएको छ । यसअघि ऐनमा यस्तो व्यवस्था थिएन ।
संशोधनमा विद्युतीय माध्यमबाट गरिने भुक्तानी तथा कर्जा प्रवाहलाई विद्युतीय कारोबारको परिभाषामा समेटिएको छ ।
