आईसीटी समाचार
गुगलले क्वान्टम कम्प्युटिङ चिप 'विल्लो' सार्वजनिक गरेको छ । गुगलका सीईओ सुन्दर पिचाईले सामाजिक सञ्जाल प्लेटफर्म एक्समा यसबारे पोष्ट साझा गरेका छन् । यस चिपप्रति एलन मस्कले पनि चासो देखाउँदै पिचाईको पोष्टमा वाउ प्रतिक्रिया दिएका छन् ।
सुन्दर पिचाईले यो चिपले धेरैभन्दा धेरै क्यूबिटहरूको प्रयोग गर्ने र त्रुटिहरूलाई छिटो समाधान गर्न सकिने बताए । यस चिपसेटले १०५ क्यूबिटको प्रयोग गरेर पाँच मिनेटभन्दा कम समयमा जटिल गणना पूरा गरेको थियो ।
गुगलको क्वान्टम एआई युनिटका प्रमुख हार्टमुट नेभेनले यसलाई क्वान्टम कम्प्युटिङमा एउटा महत्वपूर्ण उपलब्धि भनेका छन् । यो चिपले मेडिकल र आर्टिफिसियल इन्टेलिजेन्स (एआई) लगायत विभिन्न क्षेत्रमा ठूलो परिवर्तन ल्याउन सक्ने उनको विश्वास छ ।
पारम्परिक बाइनरी कम्प्युटरको तुलनामा क्वान्टम कम्प्युटरमा क्यूबिटको प्रयोग गरिन्छ, जुन धेरै तीव्र प्रोसेसिङका लागि परिचित छ । तर, स्थायित्व र त्रुटि दरका मामिलामा यसले केही चुनौती सामना गर्नुपर्छ । गुगलले भनेको छ कि विल्लो चिपमा त्रुटि दर कम गर्न अत्याधुनिक प्रविधिको प्रयोग गरिएको छ । यसले रियल टाइम करेक्शन मार्फत क्वान्टम मेसिनहरूको व्यावहारिकता बढाउँछ ।
हालसम्म विल्लो चिपको पूर्ण क्षमताहरू परीक्षण गरिएको छैन् । यद्यपि, यसले जटिल समस्याहरूलाई क्लासिकल कम्प्युटिङको तुलनामा निकै कम समयमा समाधान गर्न सक्छ । अनुसन्धानकर्ताहरू विश्वास गर्छन् कि यो प्रविधि क्षेत्रमा ठूलो चमत्कार साबित हुन सक्छ ।
क्लासिकल बिट्सले कुनै पनि गणनाका लागि बाइनरी ० वा १ मध्ये एक मान प्रयोग गर्दछ । तर क्यूबिटले यी दुवैलाई एकैसाथ वा विभिन्न संयोजनमा, जस्तै – ००, ०१, १० र ११ मा प्रयोग गर्न सक्छ । गणनाको यो तरिकाले क्वान्टम कम्प्युटरलाई जटिल गणनाहरू छिटो समाधान गर्न सक्षम बनाउँछ । यसले क्लासिकल वा सुपर कम्प्युटरभन्दा यसलाई उन्नत बनाउँछ ।
क्वान्टम कम्प्युटिङ हार्डवेयरमा गुगलको विल्लो चिप एक महत्वपूर्ण विकास हो । यसमा सुपरकन्डक्टिङ ट्रान्समोन क्यूबिटको प्रयोग गरिएको छ । यो सानो इलेक्ट्रिकल सर्किट हो, जुन अल्ट्रा–लो तापक्रममा क्वान्टम अवस्थामा रहन्छ । यस क्वान्टम अवस्थालाई सुरक्षित राख्नका लागि क्यूबिटलाई लगभग शून्य तापक्रममा चिसो बनाइन्छ, जसले सम्भावित त्रुटिहरूलाई कम गर्ने प्रयास गर्छ ।
विल्लो चिपमा धेरै उन्नत विशेषताहरू छन्, जसले उत्कृष्ट क्यूबिट कनेक्टिभिटी र जटिल गणनाहरूलाई कम त्रुटिका साथ समाधान गर्न सक्षम बनाउँछ । र्यान्डम सर्किट स्याम्पलिङ बेंचमार्क परीक्षणका क्रममा विल्लो चिपले धेरै गणनाहरू ५ मिनेटभन्दा कम समयमा हल गर्यो । यस गणनालाई पूरा गर्नका लागि अन्य फास्ट सुपर कम्प्युटरलाई झण्डै १० सेप्टिलियन (१०६२५) वर्ष लाग्ने अनुमान छ ।
