८५ कम्पनीको डाटा चोरी गरी क्षति पुर्याएको आरोपमा क्लाउड नेपाल आइटी नामक कम्पनीका सञ्चालक कमल पाठकलाई महानगरीय प्रहरी अपराध महाशाखा टेकुले पक्राउ गरेको छ ।

काठमाडौंको बानेश्वरस्थित सफ्टवेयर कम्पनी ई–जोन इन्टरनेश्नलमा यसअघि कार्यरत रहेका पाठकले आफू कार्यरत रहँदाको युजर नेम र पासवर्ड प्रयोग गरी डाटा चोरी गरेको पाइएको इजोनका संचालक दामोदर अधिकारीले जानकारी दिए । चैैत १ गतेदेखि जागिर छोडेका पाठकले चैत १६ गते अनधिकृत रुपमा सिस्टममा प्रवेश गरी तथ्यांक चोरी गरेको अधिकारीको भनाइ छ ।

उनले महानगरीय प्रहरी अपराध महाशाखामा पाठकविरुद्ध विद्युतीय कारोबार ऐन, २०६३ को दफा ४५ र ४६ समेतको कसुर हुने गरी जाहेरी दरखास्त गरेका छन् । सो दरखास्तमा उनले डाटा अनधिकृत रुपमा प्रयोग गरी क्षति पुर्याएको सम्बन्धमा पर्याप्त प्रमाण समेत पेश गरेका छन् ।

उनले ई–जोनले विकास गरेका सफ्टवेयरहरुहरुमा ग्राहकहरुले लगइन हुन नसकेको खबर गरेपछि जाँचबुझ गर्दा ग्राहकहरुको सफ्टवेयरको डाटा मेटिई लग इन गर्न नसकिने भएको देखाइएको जानकारी दिए । ‘चैत १६ गते विहान ५ बजेर ४९ मिनेट जादादेखि ६ बजेर ११ मिनेट जाँदासम्ममा पाठकले ८५ वटा हाम्रा ग्राहकको खासखास डाटा मेटाइदिनु भएको रहेछ, अनि हामीले प्रहरीमा जाहेरी दिएका हौं,’ अधिकारीले भने ।

पाठकले पनि डाटामा अनधिकृत पहुँच राखेको स्वीकारेका छन् ।