आइसिटी समाचार
बागमती प्रदेशले नेपाल सरकारको सहलगानीमा आवश्यक पूर्वाधार सहितको विद्युतीय बस सेवा सञ्चालन गर्न ५० करोड रूपैयाँ विनियोजन गरेको छ ।
मंगलबार प्रदेश सभामा आगामी आर्थिक वर्ष २०७८/७९ को बजेट प्रस्तुत गर्दै आर्थिक मामिला तथा योजना मन्त्री कैलाश प्रसाद ढुङ्गेलले विद्युतीय बस सेवा सञ्चालन गर्न ५० करोड रूपैयाँ विनियोजन गरेको बताएका हुन् ।
त्यस्तै विद्युतीय सवारी साधनको प्रयोगलाई प्रोत्साहन गर्न चार्जिङ स्टेशनको स्थापना गर्नुका साथै काठमाडौं- मुग्लिङ र भरतपुर-हटौडा खण्डको उपयुक्त स्थानहरुमा निजी क्षेत्रसँगको सहकार्यमा विद्युतीय चार्जिङ स्टेशनसहितको एकीकृत स्मार्ट रिफ्रेस एण्ड ट्रान्सफर सेन्टर निर्माण गरी सञ्चालनमा ल्याउन आवश्यक बजेट व्यवस्था गरेको उनले बताए ।
प्रदेशले सार्वजनिक यातायातमा बालबालिका तथा महिला उपर हुने हिंशा र अन्य दुर्व्यवहार अन्त्य गर्न प्रहरीसँगको समन्वयमा ‘तपाईको सुरक्षा एप’ विकास गरी कार्यान्यवनमा ल्याउने बजेट व्यवस्था गरेको छ ।
त्यस्तै प्रदेशले यातायात व्यवस्था कार्यालयबाट प्रदान गरिने सेवालाई छिटो छरितो र प्रभावकारी बनाउन राजस्व भुक्तानी लगायतका क्रियाकलापहरु विद्युतीय प्रणाली मार्फत सञ्चालन गर्न बजेट व्यवस्ता गरेको छ ।
