आईसीटी समाचार
काठमाडौं । गूगलले आफ्नो एआई प्लेटफर्म Gemini मा नयाँ फिचर थप्दै डिजिटल सिर्जनात्मकताको अनुभवलाई अर्को तहमा पुर्याउने प्रयास गरेको छ । ‘पर्सनल इन्टेलिजेन्स’ नाम दिइएको यो सुविधा सार्वजनिक भएसँगै अब प्रयोगकर्ताले आफ्नै रुचि, बानी र डिजिटल सामाग्रीका आधारमा सजिलै तस्बिर तयार गर्न सक्ने भएका छन् ।
यस अपडेटको मुख्य विशेषता भनेको एआईलाई अझ “व्यक्तिगत” बनाउने प्रयास गरिएको छ । यसअघि प्रयोगकर्ताले मनपर्ने नतिजा पाउन लामो विवरण (प्रम्प्ट) लेख्नुपर्ने बाध्यता थियो । तर अब Gemini ले प्रयोगकर्ताको Google Photos लगायतका सेवासँग जोडिएर उनीहरूको रुचि र शैली आफैं बुझ्ने क्षमता विकास गरेको छ । यसको अर्थ, सामान्य निर्देशनमै पनि एआईले अपेक्षाकृत सटीक र व्यक्तिगत नतिजा दिन सक्छ ।
नयाँ फिचरमार्फत प्रयोगकर्ताले आफ्नै परिवार वा नजिकका व्यक्तिलाई तस्बिरको पात्र बनाउन सक्ने व्यवस्था पनि गरिएको छ । यदि प्रयोगकर्ताले आफ्नो फोटो लाइब्रेरीलाई एआईसँग जोड्छन् भने, एआईले त्यही सामाग्री प्रयोग गरेर नयाँ दृश्य सिर्जना गर्न सक्छ । यसले डिजिटल आर्टलाई अझ भावनात्मक र व्यक्तिगत बनाउने सम्भावना बढाएको छ ।
कलात्मक स्वतन्त्रतामा पनि यो अपडेटले विस्तार ल्याएको छ । प्रयोगकर्ताले आफ्ना सामान्य आइडियालाई वाटरकलर, स्केच वा आयल पेन्टिङजस्ता फरक–फरक शैलीमा परिणत गर्न सक्नेछन् । साथै, नतिजा चित्त नबुझेमा पुन: सम्पादन र सुधार गर्ने विकल्प पनि उपलब्ध हुनेछ, जसले प्रयोगकर्तालाई एआईसँग “संवाद गर्दै सिर्जना गर्ने” अनुभव दिन्छ ।
गोपनीयताको विषयमा भने Google ले सावधानी अपनाएको जनाएको छ । कम्पनीका अनुसार प्रयोगकर्ताका निजी फोटोहरू एआई मोडल प्रशिक्षणका लागि प्रयोग गरिँदैनन्, र यो सुविधा पूर्ण रूपमा प्रयोगकर्ताको अनुमति (opt-in) मा आधारित रहनेछ ।
हालका लागि यो सुविधा अमेरिका केन्द्रित केही प्रिमियम प्रयोगकर्ताहरूमा सीमित भए पनि कम्पनीले यसलाई विस्तार गर्ने योजना बनाएको छ । आगामी दिनमा यो फिचर अन्य देश र प्लेटफर्महरूमा उपलब्ध हुने अपेक्षा गरिएको छ ।
