वेटरबाट काम सुरू गरेका एडम मसेरीको इन्स्टाग्रामको प्रमुख बनेसम्मको यात्रा

सोशल मिडिया एप्लिकेसन इन्स्टाग्राम विश्वको लोकप्रिय सामाजिक सञ्जाल मध्ये एक हो । विशेष गरी युवापुस्ताको रोजाइमा इन्स्टाग्राम पर्ने गरेको छ । 

इन्स्टाग्रामका २ अर्ब बढि प्रयोगकर्ता छन् । इन्स्टाग्राममा हामी फोटोहरू शेयर गर्छौं, स्टोरी राख्छौं, स्टाटस राख्छौं । इन्स्टाग्रामबाटै हामी किनमेल पनि गर्न सक्छौं ।

तर के तपाईंलाई थाहा छ, इन्स्टाग्रामका प्रमुख एडम मोसेरी (Adam Mosseri) कुनै समयमा वेटरको काम गर्थे ? उनले आफैं यस कुराको जानकारी दिएका छन् ।

केभिन सिस्ट्रोम र माइक क्राइगरले सन् २०१० मा फोटो शेयरिङ एप्लिकेसन इन्स्टाग्राम लन्च गरेका थिए । अप्रिल २०१२ मा मेटाले इन्स्टाग्रामलाई किन्यो । इन्स्टाग्रामका हालका सीईओ एडम मोसेरी हुन् । मोसेरीले थ्रेसमार्फत पहिले वेटरको काम गर्ने गरेको र त्यसपछि बारटेंडरको भनेर बताएका छन् । त्यसपछि उनी डिजाइनर र म्यानेजर बने । वेटरको काम गर्ने मोसेरी जीवनको यो मोडपछि प्रोडक्ट म्यानेजर बने । हाल उनी इन्स्टाग्रामका प्रमुख पदमा छन् ।

दृढ निश्चय, परिश्रम र आत्मविश्वासको बलमा मोसेरीले आफ्नो भाग्यको रेखाहरू बदलिदिए । टेबलमा मानिसहरूलाई खाना पस्कने व्यक्तिले डिजाइनको दुनियाँमा पाइला राखे र अन्ततः मेटाको महत्त्वपूर्ण पदमा पुगे ।

भाँडा तिर्न वेबसाइट डिजाइनिङ्ग सुरु गरे

एडम मोसेरीको जन्म न्यूयोर्क, अमेरिका मा भएको हो । उनले न्यूयोर्क विश्वविद्यालयको गालटिन स्कूल अफ इन्टरडिसिप्लिनरी स्टडीबाट सूचना र डिजाइनमा मेजर गरेका छन् । घरको भाँडा तिर्नका लागि उनले वेबसाइट डिजाइनिङ्ग सुरु गरेका थिए ।

न्यूयोर्क विश्वविद्यालयमा अध्ययनको क्रममा एडम मोसेरीले आफ्नो डिजाइन फर्म ब्ल्यांक मोसेरी सुरु गरे । यो कम्पनी ग्राफिक्स, इन्टरेक्शन र एक्जिबिट डिजाइनमा केन्द्रित थियो । यस फर्मले वन वर्ल्ड ट्रेड सेन्टरको रेंडरिंग समेत गरेको थियो । कम्पनीलाई सफलता मिल्दै गयो र उनले सान फ्रान्सिस्कोमा आफ्नो दोस्रो अफिस पनि खोले । 

संगीत शेयर गर्ने एप बनाए, फेसबुकबाट फोन आयो

सन् २००५ मा विश्वविद्यालयको अध्ययन सकेपछि मोसेरी फर्मको कामको लागि सान फ्रान्सिस्को सरे । द न्यूयोर्क टाइम्ससँग कुरा गर्दै मोसेरीले भने, उनले बुमबक्स नामको संगीत शेयर गर्ने एप बनाएका थिए । यो एप चलेन, तर यस एपका कारण फेसबुकको ध्यान उनीतर्फ गयो । 

सन् २००६ मा उनले अकडदमी अफ आर्ट विश्वविद्यालय, सान फ्रान्सिस्कोमा सहायक प्राध्यापकको जागिर सुरु गरे । एक वर्ष अध्यापन गरेपछि उनी लाइभ–भिडियो स्टार्टअप टकबक्ससँग जोडिए । उनी यस कम्पनीका पहिलो प्रोडक्ट डिजाइनर थिए । 

एडम मोसेरी सन् २००८ मा फेसबुकसँग जोडिए, जहाँ उनकी जीवनसाथी मोनिका पनि काम गर्थिन् । सन् २०१२ मा प्रोडक्ट म्यानेजमेन्ट छोडेर मोसेरीले फेसबुकको मोबाइल एप र असफल फेसबुक होममा काम गर्न थाले । 

मोसेरीलाई न्यूज फीडको जिम्मेवारी दिइएको थियो । सन् २०१६ मा फेसबुक सबैभन्दा कठिन समयबाट गुज्रिरहेको थियो । रुसी प्रोपेगन्डा, फेक न्यूज आदिको बाढी आएको थियो ।

झन्डै एक दशकदेखि फेसबुकमा काम गरिरहेका एडम मोसेरी, सीईओ जुकरबर्गका नजिकका मानिन्छन् । दुबैको सामाजिक सर्कल पनि एउटै छ, धेरैपटक बिहानको दौडमा सँगै जान्छन् । दुबैका बच्चाहरूको उमेर पनि करिब समान छ ।

मे २०१८ मा एडम मोसेरीले इन्स्टाग्रामको भीपी प्रोडक्टको पद सम्हाले । सेप्टेम्बर २०१८ मा सिस्ट्रोम र क्रेगरले फेसबुक छोड्ने घोषणा गरे । एक हप्तापछि फेसबुकले एडम मोसेरीलाई इन्स्टाग्रामको प्रमुख बनायो । फेसबुकमा छ वटा फरक भूमिका निभाएपछि एडम मोसेरीलाई सबैभन्दा ठूलो जिम्मेवारी दिइएको हो । हाल उनले इन्स्टाग्रामलाई विश्वकै सर्वचर्चित एप बनाउनमा लागि परेका छन् र प्रयोगकर्ताको माग बुझ्दै एपलाई अपडेट गर्दै लगिरहेका छन् । हाल इन्स्टाग्रामको सर्ट भिडियो प्लेटफर्म रिल्सले एकदमै चर्चा पाईरहेको छ । 

(एजेन्सीहरुको सहयोगमा)