आईसीटी समाचार
काठमाडौं । बैंकका कर्मचारी बनेर फोन गर्ने र ‘केवाईसी अपडेट’ गर्नुपर्ने भन्दै ओटीपी (One-Time Password) मागेर बैंक खाताबाट रकम चोरी गर्ने गिरोहका चार जनालाई प्रहरीले पक्राउ गरेको छ । नेपाल प्रहरीको साइबर ब्युरोले यस्तो ठगीमा संलग्न रहेको आरोपमा चार जनालाई पक्राउ गरेको हो ।
पक्राउ पर्नेमा बारा देउताल गाउँपालिका ४ का २२ वर्षीय अभय तिवारी, पश्चिम नवलपरासी रामग्राम नगरपालिका १६ का २२ वर्षीय जयकुमार केवट, सोही नगरपालिका १७ का २२ वर्षीय विद्यासागर केवट र पर्साको वीरगञ्ज महानगरपालिका ३ का २७ वर्षीय कुवेर थापा रहेका छन् ।
प्रहरीका अनुसार पक्राउ परेका व्यक्तिहरूले बहालवाला तथा अवकाश प्राप्त कर्मचारीलाई लक्षित गरी ठगी गर्दै आएका थिए ।
यसरी गर्थे ठगी
अनुसन्धानका क्रममा उनीहरूले बैंकका कर्मचारी भएको दाबी गर्दै पीडितलाई फोन गर्ने गरेको खुलेको छ । फोनमा ‘बैंकबाट बोलेको हुँ, तपाईंको केवाईसी अपडेट गर्नुपर्छ’ भन्दै विश्वासमा पार्ने र त्यसपछि ह्वाट्सएप कलमार्फत मोबाइलको स्क्रिन सेयर गर्न लगाउने गरेको प्रहरीले जनाएको छ ।
स्क्रिन सेयर गराएपछि पीडितको मोबाइलमा आउने ओटीपी कोड प्राप्त गरी बैंक खातामा अनधिकृत पहुँच बनाउने र खातामा रहेको रकम अन्य खातामा रकमान्तर गरेर ठगी गर्ने गरेको अनुसन्धानबाट खुलेको छ ।
प्रहरीले यस प्रकारको ठगीमा बैंक तथा वित्तीय संस्थाले फोन गरेर ओटीपी, पासवर्ड वा अन्य गोप्य विवरण माग्दैनन् भन्ने विषयमा सचेत रहन आग्रह गरेको छ । अपरिचित व्यक्तिले बैंकको कर्मचारी भएको दाबी गर्दै फोन गरेमा कुनै पनि अवस्थामा ओटीपी नदिने, स्क्रिन सेयर नगर्ने र शंकास्पद लिंकमा क्लिक नगर्न प्रहरीले सुझाव दिएको छ ।
