आईसीटी समाचार
काठमाडौं । ल्यापटप प्रयोगकर्तालाई सर्भिस तथा प्राविधिक सहयोग उपलब्ध गराउने उद्देश्यले ‘निओ सर्भिस क्याम्प’ सुरु भएको छ ।
सूचना प्रविधि, ग्याजेट तथा मनोरञ्जनसम्बन्धी विभिन्न उत्पादन बिक्री गर्दै आएको निओ स्टोरले ‘नेभर स्टप केयरिङ’ अर्थात् ग्राहकको निरन्तर ख्याल राख्ने उद्देश्यसहित उक्त क्याम्प आयोजना गरेको हो ।
क्याम्पमा ल्यापटपको सफाइ, सर्भिसिङ, प्राविधिक परामर्श, अपग्रेड तथा एक्सचेन्जलगायतका सुविधा उपलब्ध हुने कम्पनीले जनाएको छ । कम्पनीका अनुसार काठमाडौं र पोखरास्थित निओ स्टोरका विभिन्न शाखामा क्याम्प सञ्चालन भइरहेको छ ।
यसअघि पनि आयोजना गरिएको उक्त कार्यक्रममा ५ हजारभन्दा बढी ग्राहक सहभागी भएका थिए । ग्राहकको उल्लेख्य सहभागितालाई ध्यानमा राख्दै कम्पनीले पुन: क्याम्प सञ्चालन गरेको जनाएको छ ।
क्याम्पमा नयाँ तथा पुराना दुवै ल्यापटप प्रयोगकर्ताले सेवा लिन सक्नेछन् । आधिकारिक रूपमा खरिद गरिएका वा ग्रे मार्केटबाट खरिद गरिएका जुनसुकै ब्रान्डका ल्यापटपमा समेत सेवा उपलब्ध हुने कम्पनीले जनाएको छ ।
लामो समयसम्म प्रयोग गर्दा ल्यापटपभित्र धुलो तथा फोहोर जम्मा हुन सक्ने भएकाले त्यसलाई सफा गरी ल्यापटपको कार्यक्षमता सहज बनाउन क्याम्पमा ‘डीप क्लिनिङ’ सेवा उपलब्ध गराइएको छ ।
त्यस्तै, ग्राहकले नि:शुल्क रूपमा ल्यापटपको सामान्य जाँच गराउनुका साथै देखिएका समस्याबारे प्राविधिक परामर्श लिन सक्नेछन् । नयाँ ल्यापटप खरिद तथा पुरानो ल्यापटप अपग्रेड गर्न चाहने ग्राहकका लागि पनि सुपथ मूल्यमा विभिन्न विकल्प उपलब्ध हुने कम्पनीले जनाएको छ ।
ल्यापटप ढिलो चल्ने, अत्यधिक तात्ने वा प्रयोगका क्रममा विभिन्न समस्या देखिने अवस्थामा ग्राहकले प्राविधिक टोलीसँग परामर्श लिन सक्नेछन् । प्राविधिक टोलीले ल्यापटपको अवस्था परीक्षण गरी सम्भावित समस्या तथा आवश्यक अपग्रेडबारे सुझाव दिने जनाइएको छ ।
पुरानो ल्यापटपको क्षमता बढाउन चाहने प्रयोगकर्ताका लागि र्याम, एसएसडी तथा ल्यापटपसँग मिल्ने अन्य हार्डवेयर अपग्रेडका विकल्पसमेत उपलब्ध हुने कम्पनीले जनाएको छ ।
क्याम्पमा पुरानो ल्यापटप नयाँ ल्यापटपसँग साट्न सकिने एक्सचेन्ज सुविधा पनि उपलब्ध छ । एक्सचेन्जका क्रममा ल्यापटपको ब्रान्ड, मोडल, भौतिक तथा प्राविधिक अवस्था, हार्डवेयर र बजार मूल्यलगायतका आधारमा मूल्यांकन गरिने कम्पनीले जनाएको छ ।
ग्राहकले नयाँ ल्यापटप किस्ताबन्दीमा समेत खरिद गर्न सक्नेछन् । यद्यपि, एप्पलका म्याकबुकमा भने किस्ताबन्दी तथा सर्भिसिङ सुविधा उपलब्ध नहुने कम्पनीले स्पष्ट पारेको छ ।
