मेटाले ल्यायो नयाँ फीचर : अभिभावकले बच्चाको एआई प्रयोग ट्र्याक गर्न सक्ने

काठमाडौं । Meta ले अभिभावकहरूका लागि नयाँ सुविधा सार्वजनिक गरेको छ, जसअन्तर्गत उनीहरूले १८ वर्षभन्दा कम उमेरका आफ्ना बालबालिकाले Facebook, Instagram र Messenger मा रहेको Meta AI कसरी प्रयोग गरिरहेका छन् भन्ने बुझ्न सक्नेछन् ।

कम्पनीका अनुसार यो नयाँ सुविधा ‘Supervision Hub’ भित्र रहेको ‘Insights’ ट्याबमा उपलब्ध हुनेछ । यसमार्फत अभिभावकहरूले आफ्नो बच्चा Meta AI सँग कुन कुन विषयमा कुराकानी गरिरहेको छ भन्ने सामान्य जानकारी हेर्न सक्नेछन् ।

तर Meta ले स्पष्ट गरेको छ, यसमा प्रत्यक्ष च्याटको विवरण देखाइँदैन । केवल विषयगत श्रेणीहरू मात्र देखाइनेछन्, जसले बालबालिकाको गोपनीयता (privacy) पनि कायम राख्नेछ ।

उदाहरणका लागि, यदि बालबालिकाले स्कूल, मनोरञ्जन, जीवनशैली, यात्रा, लेखन वा स्वास्थ्य तथा कल्याणसँग सम्बन्धित विषयमा AI प्रयोग गरेका छन् भने ती श्रेणीहरू देखिनेछन् । जीवनशैली अन्तर्गत फेसन, खाना र छुट्टीजस्ता विषय पनि समावेश हुन सक्छन् । त्यस्तै, स्वास्थ्य तथा कल्याणमा फिटनेस, शारीरिक स्वास्थ्य र मानसिक स्वास्थ्य सम्बन्धी विषयहरू देखिन सक्छन् ।

कम्पनीले यो सुविधाको उद्देश्य बालबालिकामाथि निगरानी (जासुसी) गर्नु नभई अभिभावक र बालबालिकाबीच डिजिटल गतिविधिबारे संवाद सुरु गर्न सहयोग गर्नु रहेको जनाएको छ । यदि बालबालिका कुनै विशेष विषयमा बढी समय बिताइरहेका छन् भने अभिभावकहरूले त्यसबारे सहज रूपमा छलफल गर्न सक्नेछन् ।

हाल यो सुविधा अमेरिका, बेलायत, अस्ट्रेलिया, क्यानडा र ब्राजिलमा उपलब्ध छ । Meta ले आगामी हप्ताहरूमा यसलाई अन्य देशहरूमा पनि विस्तार गर्ने योजना बनाएको छ । यसका साथै Meta ले युवाहरूका लागि सुरक्षित AI प्रयोग सुनिश्चित गर्न ‘AI Wellbeing Expert Council’ नामक विशेषज्ञ समूह पनि गठन गरेको छ । यो पहलले भविष्यमा बालबालिकाका लागि डिजिटल सुरक्षालाई अझ सुदृढ बनाउने अपेक्षा गरिएको छ ।