आईसीटी समाचार
काठमाडौं । ओपनएआईले च्याटजीपीटीका लागि नयाँ Apple Messages प्लगइन सार्वजनिक गरेको छ । यसमार्फत प्रयोगकर्ताले आफ्नो Apple Messages इनबक्सलाई च्याटजीपीटीसँग जोड्न सक्नेछन् ।
यो सुविधाको प्रयोग गरी प्रयोगकर्ताले आफ्ना सन्देश व्यवस्थित गर्ने, विश्लेषण गर्ने तथा सम्पादन गर्ने काम च्याटजीपीटीमार्फत गर्न सक्नेछन् । नयाँ प्लगइन Codex र ChatGPT Work मा समेत प्रयोग गर्न सकिनेछ । यसले व्यक्तिगत कुराकानीसँगै कार्यालय तथा व्यावसायिक कामका लागि पनि च्याटजीपीटीको प्रयोगलाई सहज बनाउने ओपनएआईले जनाएको छ ।
नयाँ Apple Messages प्लगइनमार्फत च्याटजीपीटीले प्रयोगकर्ताका लागि जवाफी सन्देश तयार गर्ने, सन्देश पठाउने वा मेटाउने तथा पुराना सन्देशमा आवश्यक जानकारी खोज्ने सुविधा दिनेछ ।
तर, यो सुविधासँगै प्रयोगकर्ताको गोपनीयताबारे प्रश्न समेत उठेको छ । ओपनएआईका अनुसार प्लगइन प्रयोगकर्ताको डिभाइसमा नै चल्नेछ र यसले सबै सन्देशको इन्डेक्स तयार गर्ने छैन ।
च्याटजीपीटीमार्फत सन्देश पठाउँदा प्रयोगकर्तालाई पठाउनुअघि सन्देश पुन: जाँच गर्न ओपनएआईले सुझाव दिएको छ । साथै, कम्पनीले Persistent Approval सुविधा प्रयोग नगर्न पनि आग्रह गरेको छ ।
ओपनएआईका अनुसार यस्तो स्वीकृति सक्रिय गर्दा च्याटजीपीटीले प्रयोगकर्ताको तर्फबाट सन्देश पठाउनुअघि अन्तिमपटक समीक्षा गर्ने अवसर हट्न सक्छ । त्यसैले महत्वपूर्ण वा संवेदनशील सन्देश पठाउँदा प्रयोगकर्ताले प्रत्येकपटक अन्तिम स्वीकृति दिने विकल्पलाई प्राथमिकता दिनुपर्ने कम्पनीको सुझाव छ ।
