आईसीटी समाचार
काठमाडौं । नयाँ तथा पुराना सवारी साधनको दर्ता र नामसारी प्रक्रिया सहज बनाउन यातायात व्यवस्थापन कार्यविधि निर्देशिका, २०६० का केही प्रावधान संशोधन गरिएको छ । संशोधित व्यवस्थाअनुसार अब सवारी धनी स्वयं यातायात व्यवस्था कार्यालयमा उपस्थित नभए पनि सवारी दर्ता तथा नामसारीको काम गर्न सकिनेछ ।
पूर्वाधार विकास मन्त्रालयका अनुसार संशोधनले सवारी दर्ता, नामसारी, बीमा तथा नवीकरणसम्बन्धी प्रक्रियालाई सरल, सहज र सेवाग्राहीमैत्री बनाउने अपेक्षा गरिएको छ ।
वारेसनामामार्फत दर्ता र नामसारी गर्न सकिने
संशोधित व्यवस्थाअनुसार सवारी खरिदकर्ताले वारेसनामा दिएको व्यक्तिमार्फत सवारी दर्ता तथा नामसारीको काम गराउन सक्नेछन् । यसका लागि वारेसनामा प्राप्त व्यक्तिले आफ्नो सक्कल परिचयपत्र, खरिदकर्ताको फोटो र खरिदकर्ताको सक्कल परिचयपत्रसहित सम्बन्धित यातायात व्यवस्था कार्यालयमा उपस्थित हुनुपर्नेछ ।
यस व्यवस्थाले व्यक्तिगत रूपमा कार्यालयमा उपस्थित हुन नसक्ने सवारी धनी तथा खरिदकर्तालाई राहत पुग्ने अपेक्षा गरिएको छ ।
डिलरबाट गरिएको जाँचलाई मान्यता
नयाँ व्यवस्थाअनुसार डिलरबाट गरिएको सवारी साधनको जाँचलाई नै अन्तिम मान्यता दिइनेछ । त्यसपछि पुन: सवारी साधन यातायात व्यवस्था कार्यालयमा लगेर जाँच गराउनुपर्ने छैन । यसले सवारी दर्ताका क्रममा हुने अतिरिक्त झन्झट र समयको बचत गर्ने अपेक्षा गरिएको छ ।
बीमा र नवीकरणमा पनि सहजता
संशोधित व्यवस्थाले सवारी साधनको बीमा तथा बीमा नवीकरणका लागि सवारी धनी स्वयं उपस्थित हुनुपर्ने बाध्यता पनि हटाएको छ । यसबाट सेवाग्राहीले सम्बन्धित कामका लागि व्यक्तिगत रूपमा कार्यालय धाउनुपर्ने झन्झट कम हुने अपेक्षा गरिएको छ ।
बायोमेट्रिकका लागि कम्पनीलाई प्राविधिक पहुँच
सवारी साधन नामसारी गर्दा आवश्यक बायोमेट्रिक विवरण लिन सकिने व्यवस्था मिलाउन यातायात व्यवस्था कार्यालयले सवारी विक्रेता, वितरक वा सम्बन्धित कम्पनीलाई आवश्यक प्राविधिक पहुँच उपलब्ध गराउनेछ ।
यस व्यवस्थाले नामसारी प्रक्रियालाई थप व्यवस्थित र सहज बनाउन सहयोग पुग्ने अपेक्षा गरिएको छ । मन्त्रालयका अनुसार निर्देशिकामा गरिएको संशोधनले सवारी साधनको दर्ता तथा नामसारी प्रक्रियामा हुने अनावश्यक झन्झट घटाउनुका साथै सेवाग्राहीलाई छिटो, सहज र प्रभावकारी सेवा उपलब्ध गराउन मद्दत गर्नेछ ।
