सामुदायिक विद्यालयमा टेलिकमले आईसीटी ल्याब स्थापना गर्ने, नमस्ते वाईफाई उपलब्ध गराउने

नेपाल टेलिकमले सामुदायिक विद्यालयहरूमा आईसीटी ल्याब स्थापना गर्ने भएकाे छ । २० ओैं वार्षिकाेत्सवकाे अवसरमा मन्तव्य राख्दै नेपाल टेलिकमकी निमित्त प्रबन्ध निर्देशक संगीता पहाडीले यस्ताे बताएकी हुन् ।

संस्थागत सामाजिक उत्तरदायित्व अन्तर्गत टेलिकमले सामुदायिक विद्यालयहरूमा आईसीटी ल्याब स्थापना गर्ने भएकाे हाे ।

यस बाहेक सरकारी तथा सामुदायिक विद्यालयहरुमा एफटीटीएच डेटा/नमस्ते वाईफाई उपलब्ध गराउने टेलिकमकाे याेजना छ ।

यस्तै वीर अस्पतालमा बिरामी तथा कुरुवाहरुको लागि बेड कम चेयर उपलब्ध गराइने टेलिकमले जनाएकाे छ । त्यसैगरी सामाजिक उत्तरदायित्व अन्तर्गत रुकुम पूर्व, रुकुम पश्चिम र जाजरकोट जिल्लामा गत कात्तिक १७ गते गएको शक्तिशाली भूकम्पबाट प्रभावितहरुलाई टेन्ट, ब्ल्यान्केट तथा म्याट्रेस उपलब्ध गराईनुका साथै त्यस क्षेत्रमा नेपाल टेलिकमको सिमकार्डमा ५ दिनसम्म निः शुल्क Voice सेवा उपलब्ध गराईएकाे छ ।