आईसीटी समाचार
स्वास्थ्य तथा जनसंख्या मन्त्रालयले राकुटेन भाइबरसँगको सहकार्यमा स्वास्थ्य सूचना अभियान सुरू गरेको छ । यो सहकार्यसँगै भाइबरबाटै स्वास्थ्य सम्बन्धि महत्त्वपूर्ण जानकारीहरू लिन सकिने छ ।
MoHP Nepal भाइबर च्यानलबाट स्वास्थ्य सम्बन्धि आधिकारिक जानकारी तथा सूचना पाइने छ भने क्यान्सर, मानसिक स्वास्थ्य, फुड न्यूट्रिसन, सर्भिकल क्यान्सर लगायतका रोगको जानकारी, रोकथाम, कारण तथा लक्ष्णका लागि टिप्स र विशेषज्ञको सल्लाह समेत योजना अगाडि सारिएको छ ।
साथै स्वास्थ्य सूचना अभियानको ब्राण्ड एम्बास्डरमा अभिनेत्री ऋचा शर्मालाई नियुक्त गरिएको छ । MoHP Nepal च्यानल यसअघि नै सुरू भएपनि आधिकारिक सहकार्यको घोषणा भने आईतबार गरिएको हो
नागरिकहरूलाई महत्त्वपूर्ण जानकारी तथा आधिकारिक सूचनाहरू प्रदान गर्ने र समुदायको सहभागिता बढाउन उदेश्यले स्वास्थ्य मन्त्रालयसँग सहकार्य गरेको भाइबर एशिया प्यासिफिक क्षेत्रका बिजनेस डेभलपमेन्ट निर्देशक नितिन त्यागीले बताए ।
यस्तै कार्यक्रममा बोल्दै स्वास्थ्य तथा जनसंख्या मन्त्रालयका प्रवक्ता डा। प्रकाश बुढाथोकीले भाइबरलाई अब आधिकारिक सूचना प्रदान गर्ने माध्यमका साथै टेलिमेडिसनको रूपमा पनि उपयोग गर्न खाजेको बताए ।
''सुरूमा हामीले च्यानलबाट स्वास्थ्य सम्बन्धि सूचनाहरू दिन्छौं,' उनले भने, 'त्यसपछि विस्तारै टेलिमेडिसिनको रूपमा उपयोग गर्ने योजना छ ।
नेपालमा भएका स्वास्थ्यकर्मीहरूलाई सो च्यानलमा जोडेर विरामीहरूलाई विशेषज्ञ सल्लाह दिने योजना मन्त्रालयले बनाएको छ । यसले गर्दा विशेषगरी दुर दराजमा रहेका सेवाग्राही लाभान्वित हुने मन्त्रालयको अपेक्षा छ ।
यस्तै भाइबर, एसिया पेसेफिकका सिनियर डाइरेक्टर डेभिड चेले नेपाल सरकारसँगको सहकार्यले पारदर्शिता, संलग्नता र महत्त्वपूर्ण सूचनाहरूमा नागरिकको पहुँच बढाउनका लागि प्रविधिको प्रयोगमार्फत महत्वपूर्ण कदम अगाडि बढेको बताए ।
सार्वजनिक सूचनाहरू भाइबर भाइबर क्म्युनिटी च्यानलबाटै प्रदान गर्ने उद्देश्यले भाइबरले नेपाल सरकारका विभिन्न निकायसँग सहकार्य गर्दै आएको छ । त्यसै अनुसार स्वास्थ्य मन्त्रालयसँग पनि सहकार्य गरिएको हो ।
नागरिकहरूलाई सरकारका पहल, नीति र सार्वजनिक कार्यक्रमहरूका बारेमा जानकारी गराउनको लागि केन्द्रीकृत हबको रूपमा काम गर्ने भाइबरले विश्वास लिएको छ ।
