स्नेहा झा
स्मार्टफोन हाल हाम्रो जीवनको महत्त्वपूर्ण हिस्सा बनिसकेको छ । यदि तपाईंसँग सोधियो भने तपाईँले आफ्नो फोन अन्तिम पटक कहिले स्वीच अफ गर्नुभएको थियो, सायद तपाईँले भन्नै सक्नुहुन्न होला । तर, हप्तामा कम्तीमा एक पटक स्मार्टफोन स्वीच अफ गर्नु धेरै कारणहरूबाट फाइदाजनक हुन सक्छ ।
ब्याट्री र प्रदर्शनलाई सुधार गर्न
जब स्मार्टफोनलाई नियमित रूपमा बन्द गरिन्छ, तब ब्याट्रीको आयु र फोनको प्रदर्शनमा सुधार आउँछ । यसले फोनको ब्याट्रीलाई केही समयका लागि आराम दिन्छ र यसको आयु लम्ब्याउन मद्दत गर्न सक्छ ।
मेमोरी (र्याम)लाई रिफ्रेश गर्न
फोन लगातार अन हुँदा विभिन्न एप र ब्याकग्राउन्ड प्रोसेसहरू चलिरहेका हुन्छन्, जसले र्यामलाई भार दिन सक्छ । यसलाई बन्द गर्दा सबै एप र प्रोसेसिङ बन्द हुन्छन्, जसले गर्दा फोनको र्याम रिफ्रेश हुन्छ र यो थप स्मूथ रूपमा काम गर्न थाल्छ ।
ओभरहिटिङ कम गर्न
फोनको लगातार प्रयोगले यसलाई तातो बनाउन सक्छ । यसलाई बन्द गर्दा फोन चिसो हुन्छ र ओभरहिटिङको समस्यामा कमी आउँछ ।
सिस्टम अपडेट र इन्स्टलेशनमा सहयोग गर्न
धेरैपटक फोनलाई रिबुट गर्दा सफ्टवेयर अपडहरू राम्रोसँग इन्स्टल हुन्छन् । जब हामी फोन बन्द गर्छौं र फेरि सुरु गर्छौं, यसले सुनिश्चित गर्छ कि सफ्टवेयर र एप सहीसँग इन्स्टल र अपडेट भएका छन् ।
फोनको स्पीडमा सुधार गर्न
समयसँगै फोनको स्पीड सुस्त हुन थाल्छ । यसलाई एकपटक बन्द गर्दा क्यास मेमोरी क्लियर हुन्छ, जसले गर्दा फोन छिटो काम गर्न थाल्छ ।
स्ट्रेस र डिजिटल डिटोक्स
फोन बन्द गर्दा तपाईँलाई केही समयका लागि डिजिटल दुनियाँबाट टाढा बस्न अवसर मिल्छ, जसले मानसिक तनाव कम गर्छ । यस समयमा तपाईँ आफ्नो वास्तविक जीवनका वरपरका मानिसहरू र कामहरूमा ध्यान केन्द्रित गर्न सक्नुहुन्छ, जुन एक प्रकारको डिजिटल डिटोक्स हो ।
नयाँ कनेक्शन र नेटवर्क सिग्नल
फोनलाई रिबुट गर्दा नेटवर्क र सिग्नलमा पनि सुधार हुन सक्छ । कहिलेकाहीँ लामो समयसम्म अन हुँदा नेटवर्क कमजोर हुन सक्छ, तर यसलाई बन्द गरेर फेरि सुरु गर्दा नेटवर्क सिग्नल फेरि बलियो हुन सक्छ ।
