नेपाली साइबर सुरक्षा अनुसन्धानकर्ता नरेश लाम्गादे ले एउटा बग बाउन्टी प्रोग्रामबाट १ करोड २० लाखबढी आम्दानी गर्न सफल भएका छन् ।

उनले बगक्राउडको सिंगल बग बाउन्टी प्रोग्राम जोडिएपछि ढेड वर्षको अवधिमा १ लाख १ हजार ४ सय डलर अर्थात १ करोड २० लाख नेपाली रूपैयाँभन्दा बढी आम्दानी गर्न सफल भएको बताए ।

सन् २०१९ को अन्त्यतिर बगक्राउडको सिंगल बग बाउन्टी प्रोग्राममा उनले आफ्नो यात्रा शुरू गरेका थिए । ‘सिंगल प्रोग्राममा केन्द्रित हुनाले लुकेका फङ्सनहरु बुझ्न र बग पत्ता लगाउन मद्दत हुन्छ र एप्लिकेसनसँग राम्रो अनुभव पनि प्राप्त हुन्छ,’ उनले भने ।

साइबर सेक्युरिटी ब्याचलर गरेका गरेका लाम्गादे बग पत्ता लगाउने क्षेत्रमा नयाँ भने होइनन् । सन् २०१३ देखि नै यस क्षेत्रमा लागेर बग खोज्न थालेका हुन् ।

उनी सन् २०१८ मा बग क्राउडमा जोडिए । सन् २०१९ को अन्त्यतिर बगक्राउडको सिंगल बग बाउन्टी प्रोग्राममा उनले आफ्नो यात्रा शुरू गरेका थिए । उनले इसेवा, कान्तिपुर र नेपाल टेलिकममा समेत काम गरिसकेका छन्।

उनले हाल २ वटा कम्पनी सञ्चालन गरिरहेका छन् । एउटा सिनिकल टेक्नोलोजी र अर्को बगभी । सिनिकल टेक्नोलोजीले विभिन्न कम्पनीलाई साइबर सेक्युरिटी प्रदान गर्दछ भने बगभी चाहिँ नेपालको पहिलो बग बाउन्टी प्लेटफर्म हो ।

डेढ वर्षको मिहिनेतपछि बगभी सन् २०२० मा सार्वजनिक भएको थियो । विदेशीहरुले बग बाउन्टी प्लेटफर्म स्थापना गरेर फाइदा लिएका छन् भने नेपाली कम्पनीले किन नलिने भनेर बगभी स्थापना गरेको बगभीका संस्थापक नरेश लाम्गादेले बताए ।

बग बाउन्टी प्लेटफर्म स्थापना गरेर नेपाली कम्पनीले किन फाइदा नलिने भनेर बगभी स्थापना भएको हो,’ उनले आइसिटी समाचारसँग कुरा गर्दै भने, ‘सेक्युरिटी त विश्वभर सबैलाई एउटै हो ।’

बगभीमा अहिले विश्वभरबाट ३५ सय साइबर सुरक्षा अनुसन्धानकर्ता जोडिएका छन् भने १५ भन्दा बढी कम्पनी आवद्ध भइसकेका छन् । बगभीमा आवद्ध हुने जारी नै रहेको छ ।

विदेशीलाई कम्पनीलाई पनि बगभीमा आवद्ध गराउने योजना रहेको लाम्गादेले सुनाए । प्रडक्ट अलि स्टेबल भएपछि विदेशी कम्पनी पनि आवद्ध हुने उनले बताए । त्यस्तै उनले साइबर सुरक्षा प्रदान गर्ने उदेश्यले सन् २०१७ मा सिनिकल टेक्नोलोजी स्थापना गरेका थिए ।

यसले विभिन्न सरकारी तथा नीजी कम्पनीलाई साइबर सुरक्षा प्रदान गरिरहेको छ । सिनिकलले इसेवा, नागरिक एप, सामाजिक सुरक्षा कोष लगायत विभिन्न संस्थालाई सेवा प्रदान गरिरहेको छ ।