आईसीटी समाचार
नेपालमा मोबाइल बैंकिङ प्रयोग गर्ने ग्राहकहरुको संख्या यो बर्ष अत्याधिक रुपमा बृददी भएको पाइएको छ । एक बर्षमा मात्रै मोबाइल बैंकिङ प्रयोगकर्ताहरुको संख्या करिब सवा १२ लाखले बढेको छ । आफुलाई अनुकुल स्थान तथा समयमा कारोबार गर्न सकिने र प्रयोग गर्न सजिलो भएको कारण मोबाइल बैंकिङमा ग्राहकहरुको आकर्षण बढेको हो । यसैकारण दैनिक करिब एक लाखको दरले मोबाइल बैंकिङका ग्राहकहरु थपिँदै गएको राष्ट्र बैंकले जनाएको छ ।
गत असोजसम्म २९ लाख ८६ हजार ६ सय ६९ जनाले मोबाइल बैंकिङ सेवा उपयोग गर्दै आएका छन् । २०७३ को तुलनामा यो संख्या ७० प्रतिशतले बढेको हो । त्यस्तै गत बर्षको असोज सम्म भने १७ लाख हजार ५ सय ६६ जनाले मोबाइल बैंकिङको प्रयोग गरिरहेको तथ्यांक प्राप्त भएको थियो । एन्ड्रोईड मोबाइलको बढ्दो प्रयोग सँगै मोबाइल बैंकिङका ग्राहकहरु पनि बढेको बैंकरहरुले बताउँछन् । एउटा व्यक्तिले एक भन्दा बढी बैंकमा खाता खोले जस्तै मोबाइल बैंकिङमा पनि ग्राहकहरुको 'डुब्लिकेसन' भएका कारणपनि यसरि छोटो अवधिमानै धेरै ग्राहकहरु बढेको उनीहरुको तर्क छ ।
मोबाइल बैंकिङ मार्फत समान किन्न,टिकट बुकिंग तथा होटेल रेस्टुरेन्ट खर्च तिर्न लगायत अन्य धेरै प्रकारका शुल्क भुक्तानी गर्न सकिन्छ । यस्तै मोबाइल बैंकिङको सुबिधाका कारण आफ्नो खाताको ब्यलेन्स चेक गर्न,कारोबार बारे जानकारी लिन,मोबाइल रिचार्ज गर्न तथा रकम ट्रान्सफर गर्न लगायत अन्य धेरै भुक्तानीका लागि बैंक सम्म पुगिरहनु पर्ने बाध्यता छैन् ।
मोबाइल बैंकिङ सँगै गएको एक बर्षमा इन्टरनेट बैंकिङका ग्राहकहरुको संख्यामा पनि बृद्दि भएको राष्ट्र बैंकले तथ्यांक निकालेको छ । इन्टरनेट बैंकिङ गत असोज सम्म करिब ६ लाख ६८ हजार जना ग्राहकहरुले प्रयोग गरिरहेको पाइएको छ । भने अघिल्लो बर्षमा यसको संख्या ५ लाख १५ हजार ४ सय ६५ थियो । यसैगरि गत बर्षको असोजको तुलनामा यो बर्षको असोज सम्ममा एटिएम,डेबिट तथा क्रेडिट कार्ड प्रयोगकर्ताहरुको संख्या पनि बढेको राष्ट्र बैंकको तथ्यांक छ ।
मुलुकभरमा अघिल्लो बर्ष ०७३ को असोजमा एटिएम संख्या १ हजार ९ सय रहेको थियो र सोहि अवधि मा डेबिट कार्ड संख्या ४६ लाख ५७ हजार तथा ५२ हजार क्रेडिट कार्ड संख्या रहेको थियो। तर ०७४ को असोजमा भने २ हजार २ सय ८७ एटिएम संख्या र ५५ लाख ८३ हजार ९ सय डेबिट कार्ड तथा ७५ हजार ४ सय २५ क्रेडिट कार्ड जारि भएको राष्ट्र बैंकको तथ्यांक छ ।
श्रोत: कान्तिपुर दैनिक
