नयाँ रंगमा एप्पल वाच सिरिज ९ सार्वजनिक

एप्पलले आफ्नो पछिल्लो स्मार्टवाचको लागि नयाँ रंग विकल्प प्रस्तुत गरेको छ । कम्पनीले ल्याएको वाच सिरिज ९ (एप्पल वाच सिरिज ९) नयाँ कलरमा ल्याइएको हो ।

एप्पल वाच सिरिज ९ रातो रंगको विकल्पमा ल्याइएको छ । वाच सिरिज ९ को नयाँ कलर एचआईभी र एड्स विरुद्धको विश्वव्यापी लडाइलाई समर्थन गर्न ल्याइएको हो । रातो रंगको एप्पल उत्पादनबाट प्राप्त रकम एचआईभी एड्स कार्यक्रमको ग्लोबल फन्डमा दान गरिने कम्पनीले जनाएको छ ।

एप्पल वाच सिरिज ९ ले रातो एल्युमिनियम केस र मिल्दो रातो स्पोर्ट ब्यान्ड पाउँछ । नयाँ कलरमा आएको वाच सिरिज ९ लाई स्ट्यान्डर्ड मोडल जस्तै फिचरसहित ल्याइएको छ । यो घडीमा नयाँ एस् ९ चिप र क्वाड कोर न्यूरल इन्जिन छ ।

प्रयोगकर्ताले छिटो प्रशोधन र घडीमा राम्रो प्रदर्शन प्राप्त गर्छन् । कम्पनीले १८ घण्टाको ब्याट्री लाइफ भएको वाच सिरिज ९ (एप्पल वाच सिरिज ९) प्रदान गर्दछ । नयाँ वाच सिरिजलाई सिरिज ८ को तुलनामा २५ प्रतिशत राम्रो डिक्टेशन एक्युरेसी र ३० प्रतिशत छिटो गतिमा चल्ने गरी ल्याइएको छ ।

एप्पल वाच सिरिज ९ डबल ट्याप गेस्चर सुविधाको साथ ल्याइएको छ । यो सुविधा मार्फत धेरै कार्यहरू घडी स्क्रिन नछोइकन पूरा गर्न सकिन्छ ।