आईसीटी समाचार
काठमाडौं । नेपाल विद्युत प्राधिकरणले एमपावर (MPower) बिलिङ प्रणालीमा प्राविधिक सुधार गर्न लागिएकाले तीन दिनसम्म मिटर रिडिङ र नयाँ बिल जारी गर्ने सेवा प्रभावित हुने जनाएको छ ।
प्राधिकरणका अनुसार नेपाल सरकारको निर्णयअनुसार विद्युत महसुलमा मूल्य अभिवृद्धि कर (भ्याट) लागू गर्न बिलिङ प्रणालीमा आवश्यक ‘प्याच अपडेट’ गर्न लागिएको हो ।
यसका लागि साउन १७ देखि १९ गतेसम्म एमपावर प्रणालीमार्फत हुने मिटर रिडिङ तथा नयाँ बिल बनाउने काम देशभरका वितरण केन्द्रमा अस्थायी रूपमा रोकिनेछ ।
तर, यसअघि जारी भइसकेका विद्युत बिलको भुक्तानीमा भने कुनै असर नपर्ने प्राधिकरणले स्पष्ट पारेको छ । सेवाग्राहीले ई-सेवा, खल्ती, मोबाइल बैंकिङ तथा अन्य डिजिटल माध्यमबाट विद्युत महसुल यथावत् तिर्न सक्नेछन् ।
प्राधिकरणले प्रणालीलाई नयाँ भ्याट व्यवस्थाअनुसार सञ्चालन गर्न यो अद्यावधिक आवश्यक रहेको जनाएको छ । अद्यावधिक सम्पन्न भएपछि बिलिङ प्रक्रिया अझ व्यवस्थित, सहज र कानुनअनुकूल हुने विश्वास पनि प्राधिकरणले व्यक्त गरेको छ ।
साथै, सेवा अवरुद्ध हुने अवधिमा सेवाग्राहीलाई पर्न सक्ने असुविधा प्रति क्षमा माग्दै आवश्यक सहयोग र धैर्यका लागि प्राधिकरणले अनुरोध गरेको छ ।
