आईसीटी समाचार
ललितपुर महानगरपालिकाका मेयर चिरीबाबु महर्जनले ललितपुर महानगरपालिकालाई स्मार्ट सिटी बनाउने चाहना रहेको बताएका छन् ।
बिहीबारदेखि भिरिञ्ची कलेजमा सुरू भएको आईसीटी मेलालाई उद्घाटन गर्दै मेयर महर्जनले ललितपुर महानगरपालिकालाई स्मार्टसिटीको रूपमा अगाडि बढाउने बताएका हुन् ।
‘ललितपुर महानगरपालिका स्मार्टनेसको मामिलामा पायोनियर सिटी हो । स्मार्टनेसका अवयबहरू जोड्दै गएका छौं,’ उनले भने, ‘महानगरपालिकालाई स्मार्टसिटीको रूपमा अगाडि बढाउन खोजिरहेका छौं ।’
अन्य देशका शहरको स्मार्टनेसलाई ललितपुरमा महानगरमा प्रयोग गर्दै आएको समेत उनको भनाइ छ । पछिल्लो समय ललितपुर महानगरले आफुलाई स्मार्ट बनाउँदै लगेको छ ।
चार वर्ष अगाडि महानगरले नेपालको पहिलो पटक ६ स्मार्ट स्ट्रिट लाइट जडान गरेको थियो । त्यसपछि दोस्रो चरणमा १४ सय स्मार्ट स्ट्रिट लाइट जडान गरिसकेको छ । तेस्रो चरणमा ललितपुर महानगरमा पर्ने चक्रपथमा स्मार्ट स्ट्रिट लाइट राख्न लागेको महर्जनले जानकारी दिए ।
