आईसीटी समाचार
काठमाडौं । नेपाल इलेक्ट्रिक, पावर, लाइट तथा नेपाल कन्ज्युमर इलेक्ट्रोनिक्स एण्ड होम अप्लायन्सेस अन्तर्राष्ट्रिय प्रदर्शनी २०८३ साल भदौ १९ देखि २१ गतेसम्म काठमाडौंको भृकुटीमण्डप प्रदर्शनी हलमा आयोजना हुने भएको छ ।
मिडिया स्पेस सोलुसन्स प्रा.लि., एक्जिबिसन एण्ड ट्रेड सर्भिसेस इन्डिया प्रा.लि. तथा फ्युचरेक्स ट्रेड फेयर एण्ड इभेन्ट्स प्रा.लि.को संयुक्त आयोजनामा उक्त प्रदर्शनी सञ्चालन हुन लागेको हो ।
नेपालको विद्युत्, ऊर्जा, उपभोक्ता इलेक्ट्रोनिक्स तथा होम अप्लायन्सेस क्षेत्रलाई अन्तर्राष्ट्रिय व्यावसायिक मञ्चसँग जोड्ने उद्देश्यका साथ प्रदर्शनी आयोजना गरिएको हो । यस प्रदर्शनीमा स्वदेशी तथा विदेशी गरी १०० भन्दा बढी कम्पनीहरूको सहभागिता रहनेछ ।
बढ्दो जलविद्युत् उत्पादनको प्रभावकारी उपयोग, ऊर्जा दक्षता प्रवर्द्धन तथा नवीनतम प्रविधि प्रदर्शनमार्फत उद्योगी, व्यवसायी र उपभोक्ताबीच नयाँ व्यावसायिक अवसर सिर्जना गर्ने लक्ष्य आयोजकले लिएको छ ।
प्रदर्शनीमा ट्रान्समिसन तथा डिस्ट्रिब्युसन सामाग्री, ऊर्जा आपूर्ति तथा नियन्त्रण प्रणाली, वायर तथा केबल, अत्याधुनिक स्वीच, एलईडी लाइटिङ, घरेलु विद्युतीय उपकरण, सूचना प्रविधि तथा वैकल्पिक ऊर्जा प्रणालीलगायतका विभिन्न सामाग्रीहरू राखिनेछन् ।
सर्वसाधारणका लागि नि:शुल्क प्रवेशको व्यवस्था गरिएको यस ३ दिने प्रदर्शनीलाई नेपाल चेम्बर अफ कमर्स, नेपाल इन्जिनियर्स एशोसिएसन, सीन तथा इप्पान लगायतका संस्थाहरूले सहयोग गरेका छन् ।
कार्यक्रममा इन्जिनियर, व्यवसायी, प्राविधिककर्मी तथा आम उपभोक्ता गरी ३० हजारभन्दा बढी दर्शकले अवलोकन गर्ने अनुमान गरिएको छ ।
