आईसीटी समाचार
काठमाडौं । नेपाली प्रविधि कम्पनी टिङटिङले आफ्नो एआई आधारित सञ्चार उपकरणलाई अन्तर्राष्ट्रिय बजारमा विस्तार गर्दै श्रीलंकामा सेवा सुरु गरेको छ । कम्पनीले श्रीलंकाको Effective Solutions सँग सहकार्य गर्दै त्यहाँका व्यवसायहरूका लागि आधुनिक ग्राहक सञ्चार प्रणाली उपलब्ध गराउने जनाएको छ ।
कम्पनीका अनुसार ‘टिङटिङ सुइट’ नामक प्लेटफर्मले फोन कल, इमेल र सामाजिक सञ्जाललाई एउटै प्रणालीमा समेट्दै व्यवसायिक सञ्चारलाई सरल बनाउनेछ । यसले ढिलो प्रतिक्रिया दिने एवम् हराएका सन्देशजस्ता समस्यालाई समाधान गर्ने लक्ष्य राखेको छ ।
उक्त प्रणालीमा कृत्रिम बुद्धिमत्ता (एआई) प्रयोग गरी कल ट्रान्सक्रिप्सन, भावना विश्लेषण तथा स्वचालित सारांश तयार गर्ने सुविधा समावेश गरिएको छ । यसले व्यवस्थापकहरूलाई ग्राहकको प्रतिक्रिया र मनोभाव बुझ्न सहयोग गर्ने कम्पनीले जनाएको छ ।
कम्पनीले श्रीलंकामा प्रत्यक्ष सेवा प्रवाहका लागि भौतिक कार्यालय समेत स्थापना गर्ने योजना बनाएको छ । यसबाट स्थानीय स्तरमा एआई आधारित व्यवसायिक सहयोग प्रदान गरिनेछ ।
हालै अन्तर्राष्ट्रिय प्रविधि मञ्च Web Summit Qatar 2026 मा सहभागिता जनाएको कम्पनीले यो विस्तारलाई ‘Made in Nepal for World’ भन्ने लक्ष्यसँग जोडेको बताएको छ । यस कदमले नेपाली आईटी सेवा निर्यात प्रवर्द्धनसँगै रोजगारी सिर्जनामा पनि योगदान पुग्ने अपेक्षा गरिएको छ ।
सूचना प्रविधिको क्षेत्रमा नेपाली कम्पनीहरूको अन्तर्राष्ट्रिय उपस्थिति विस्तार हुँदै गएको सन्दर्भमा टिङटिङको यो कदमलाई महत्वपूर्ण उपलब्धिका रूपमा हेरिएको छ ।
