अपडेट

युट्युब, टिकटक, स्पोटिफाईमा बज्ने नेपाली गीतले पनि अब रोयल्टी पाउने, सम्झौता गर्ने तयारी

सोमबार, ७ चैत, २०७८

युट्युब, टिकटक, स्पोटिफाईमा बज्ने नेपाली गीतले पनि अब रोयल्टी पाउने भएका छन् । त्यसका लागि संगीत रोयल्टी संकलन समाज नेपालले छिट्टै सम्झौता गर्ने भएको हो ।

नेपाली गीतहरू प्रयोग हुने सबै अन्तर्राष्ट्रिय डिजिटल प्लेटफर्मसँग कुराकानी गरिरहेको संगीत रोयल्टी संकलन समाज नेपाल महासचिव बी पाण्डेले बताए ।

‘सबै डिजिटल माध्यमसँग कुरा अगाडि बढिरहेको छ । सबैसँग कुरा अगाडि बढिरहेका बेला मेटासँग पहिलो सम्झौता भएको हो,’ पाण्डेले आइसिटी समाचारसँग भने, ‘अन्तर्राष्ट्रिय प्लेटफर्म जहाँ नेपाली गीत संगीतको प्रयोग हुन्छ । ती प्रयोग हुने सबै माध्यमसँग हामी छलफलमा छौं ।’

गएको बिहीबार संगीत रोयल्टी संकलन समाजले इन्स्टाग्राम र फेसबुक रिल्समा बज्ने नेपाली गीतले रोयल्टी पाउने गरी मेटासँग सम्झौता गरिसकेको छ । अब युट्युबसँग पनि समाजले चाँडै सम्झौता गर्दैछ । युट्युबसँग समाजले १-२ पटक अनलाइन मिटिङ समेत गरिसकेको पाण्डे बताउँछन् ।

पछिल्लो समय शर्ट भिडियोका लागि लोकप्रिय प्लेटफर्म टिकटकसँग पनि कुराकानी गरिरहेको उनले जानकारी दिए । उनका अनुसार अबको १-२ महिनाभित्र युट्युब, टिकटकसँग पनि रोयल्टी पाउने विषयमा सम्झौता हुनेछ ।

$\"\"$ महासचिव पाण्डे

यी बाहेक संगीत रोयल्टी संकलन समाजले नेपाली म्युजिक प्रयोग हुने वा बज्ने डिजिटल सेवा प्रदायक (डीएसपी) एप जस्तै स्पोटिफाई, गाना लगायतसँग पनि सम्झौता गर्ने गरी कुराकानी अगाडि बढाएको छ ।

अहिले नेपाली गीत संगीतको गलत डेटा अन्तर्राष्ट्रिय प्लेटफर्महरूमा पुगेको पाण्डे बताउँछन् । ‘कुनै एउटा राम्रो गीतको गीतकार, संगीतकार र गायकको नाममा कम्पनीको नाम लेखिएको छ,’ उनी भन्छन्, ‘वास्तविक सर्जक/श्रष्टाको नाम नलेखेर डेटाहरू गएको छ । त्यसकारण यो सबै डेटालाई छुट्याउनुपर्ने जरूरी छ ।’

गतल डेटालाई छुट्याएर त्यसलाई पारदर्शी बनाउने र वास्तविक डेटा उपलब्ध गराउनु पर्ने चुनौती संगीत रोयल्टी संकलन समाज नेपालसामु छ ।

यस्ता समस्यालाई समाधान गर्न समाजको प्राविधिक टिम लागि परेको छ । यी सबै समस्या छिट्टै हल भएर अन्य डिजिटल प्लेटफर्मसँग सम्झौता हुने कुरामा महासचिव पाण्डे विश्वस्त छन् ।