आइसिटी समाचार
मुलुकमा इन्टरनेट विस्तरमा तीव्ररुपमा फैलिरहेको बेला नेपाल टेलिकमको एफटीटीएचले ठूलो सफलता हात पारेको छ । उसले एक वर्षको अवधिका एफटीटीएचबाट गरेको आम्दानीमा ४७५ प्रतिशतले वृद्धि भएको छ ।
नेपाल टेलिकमले सोमबार पत्रकार भेटघाट कार्यक्रममा तथ्यांक सार्वजनिक गर्दै आर्थिक वर्ष २०७७/७८ मा एफटीटीएचबाट ६९ करोड आम्दानी गरेको जानकारी गरायो । यो त्यसअघिको वर्षको तुलननामा ४७५ प्रतिशतले धेरै हो । आर्थिक वर्ष २०७६/७७ मा एफटीटीएचबाट गरेको आम्दानी १२ करोड रुपैयाँ रहेको थियो ।
कार्यक्रममा बोल्दै नेपाल टेलिकमका प्रबन्ध निर्देशक डिल्लीराम अधिकारीले नेपाल टेलिकमले एफटीटीएच सेवा ल्याएपछि बजारको मूल्य नियन्त्रण भएको बताए । ‘हामीले एफटीटीएच सेवा विस्तरबाट बजार हस्तक्षेप गरेका छौं,’ उनले भने, ‘इन्टरनेटको मूल्यमा नियन्त्रण भएको छ ।’
नेपाल टेलिकमले १ लाख ८० हजार एफटिटिएच जडान गरेको छ । टेलिकमले सार्वजनिक गरेको सेप्टेम्बर ५ सम्मको तथ्यांक अनुसार टेलिकमले १ लाख ८० हजार ५३४ एफटिटिएच जडान गरेको हो ।
११ लाख ७४ हजार घरधुरीका लाडि डिजिटल म्यापि सपम्न भएको छ भने ५ लाख ६४ हजारका लागि नेटवर्क जडान कार्य सम्पन्न भएको छ । साथै, १ लाख ८० हजार ग्राहकमा सेवा वितरण भएको र ५५ लाखका १०८ स्थानीय तहका १३५ स्थानहरुमा सेवाको पहुँच पुगेको प्रवक्ता राजेश जोशीले बताए ।
नेपाल टेलिकमले एउटै फाइबरबाट टेलिफोन, इन्टरनेट र टेलिभिजन सेवा उपलब्ध गराइरहेको छ । टेलिकमले एफटीटीएच सेवा अन्तर्गत मुख्यतः भ्वाइस र डाटा सेवा मात्र उपलब्ध गराइरहेकोमा गत पुस १७ देखि एनटी टिभी ब्रान्डमा आईपी टिभी सेवा समेत उपलब्ध गराइरहेको छ ।
टेलिकमले एफटिटिएच विस्तार तिब्र गतिमा अगाडि बढाएको छ । टेलिकमले चालु आर्थिक वर्षको २०७८/७९ बार्षिक कार्यक्रम अन्तर्गत मुलुकभर थप २ लाख २६ हजार फाइबर नेट विस्तारको योजना ल्याएको छ ।
टेलिकमले यो आर्थिक वर्षलाई एफटिटिएच सेवा विस्तारको वर्षको रूपमा मनाउने घोषणा पनि गरेको छ । त्यस्तै कम्पनीले यो आर्थिक वर्षमा ६५ जिल्लामा एफटिटिएच विस्तार गर्ने लक्ष्य लिएको छ ।
