आईसीटी समाचार
काठमाडौं । नेपालबाट भारततर्फ पैसा पठाउने प्रक्रिया अब थप सहज बनेको छ । ग्लोबल आईएमई बैंकको मोबाइल बैंकिङमार्फत अब प्रयोगकर्ताले भारतका कुनै पनि UPI ID मा सिधै रकम पठाउन सक्नेछन् ।
यस सुविधासँगै सीमा पार डिजिटल भुक्तानी प्रणाली थप सरल, छिटो र सुरक्षित हुने अपेक्षा गरिएको छ । बैंकका अनुसार अब ग्राहकहरूले मोबाइलबाटै केही सेकेन्डमै भारतमा रहेका परिवार, साथी वा व्यवसायिक साझेदारलाई पैसा पठाउन सक्नेछन् ।
नयाँ प्रणाली अन्तर्गत तत्काल भुक्तानी, पूर्ण रूपमा डिजिटल प्रक्रिया र एकै किसिमको स्पष्ट शुल्क संरचना रहने बताइएको छ । यसले विदेशमा अध्ययन गर्ने विद्यार्थी, यात्रु, व्यवसायीलाई ठूलो राहत दिने विश्वास गरिएको छ ।
ग्लोबल आईएमई बैंकले यो सेवा दक्षिण एसियामा डिजिटल भुक्तानीलाई अझ जोड्ने महत्वपूर्ण कदम भएको जनाएको छ । बैंकका अनुसार यसले नेपाल–भारतबीचको वित्तीय कारोबारलाई आधुनिक र सहज बनाउनेछ ।
यससँगै डिजिटल बैंकिङको प्रयोग बढ्दै गएको र सीमा पार भुक्तानी प्रणाली नयाँ चरणमा प्रवेश गरेको बैंकले उल्लेख गरेको छ ।
