आईसीटी समाचार
काठमाडौं । काठमाडौंमा जन्मिएका अजर राजभण्डारी पाँच वर्षको उमेरमै अमेरिका पुगे । बाल्यकालदेखि नै फरक परिवेशमा हुर्किएका अजरले पछि अमेरिकाको परम्परागत बैंकिङ क्षेत्रमा आफ्नो करिअर सुरु गरे । तर सुरक्षित जागिर र नियमित करिअरको बाटोले उनलाई लामो समयसम्म रोक्न सकेन ।
केही वर्षअघि उनले जागिरको चौघेरा तोडेर आफ्नै व्यवसाय सुरु गर्ने निर्णय लिए । ठूलो लगानीकर्ता खोज्नुको सट्टा उनले आफ्नै कमाइबाट बचाएको करिब ५० हजार अमेरिकी डलर लगानी गरेर ई-कमर्स कम्पनी ‘हर्ड’ स्थापना गरे ।
सानो पूँजी र सीमित जनशक्तिबाट सुरु भएको उनको यो यात्रा छोटो समयमै उल्लेखनीय व्यवसायिक सफलतातर्फ अघि बढ्यो । कम्पनीले स्थापनाको पहिलो वर्षमै करिब १ करोड ५० लाख अमेरिकी डलर आम्दानी गरेको दाबी गरिएको छ । नेपाली रुपैयाँमा यो रकम दुई अर्ब रुपैयाँभन्दा बढी हुन आउँछ । अजरको सफलताको अर्को महत्वपूर्ण पक्ष हो, उनको व्यवसाय सञ्चालन गर्ने शैली ।
सात जनाको टिम, एआईको व्यापक प्रयोग
हर्डलाई अजरले परम्परागत कम्पनीको शैलीमा होइन, प्रविधिमैत्री र चुस्त संरचनामा अघि बढाइरहेका छन् । कम्पनीमा जम्मा सात जनाको टिम रहे पनि कृत्रिम बुद्धिमत्ता अर्थात् एआई प्रविधिको व्यापक प्रयोगमार्फत उत्पादन विकास, बजार विश्लेषण, कन्टेन्ट तथा व्यवसाय सञ्चालनका विभिन्न कामलाई प्रभावकारी बनाइएको उनको भनाइ छ ।
ठूला लगानीकर्ताको दबाबबाट मुक्त भएर आफ्नो निर्णय आफैं लिन उनले ‘बुटस्ट्र्यापिङ’ मोडल रोजे । अर्थात् बाह्य लगानीमा निर्भर नभई आफ्नै स्रोत र व्यवसायबाट उत्पन्न आम्दानीलाई पुन: व्यवसाय विस्तारमा प्रयोग गर्ने रणनीति । उनका लागि यो केवल कम्पनी सञ्चालन गर्ने तरिका होइन, आफ्नो व्यवसायिक स्वतन्त्रता कायम राख्ने माध्यम पनि हो ।
‘मिनी माइक प्रो’बाट बजारमा प्रवेश
हर्डले कन्टेन्ट क्रिएटरहरूलाई लक्षित गर्दै विभिन्न इलेक्ट्रोनिक उत्पादन बजारमा ल्याएको छ । तीमध्ये ‘मिनी माइक प्रो’ नामक माइक्रोफोनले अमेरिकी बजारमा विशेष चर्चा पाएको अजरको दाबी छ ।
कन्टेन्ट क्रिएटर र सामाजिक सञ्जालमा आधारित डिजिटल अर्थतन्त्र विस्तार भइरहेका बेला सस्तो, प्रयोग गर्न सहज र गुणस्तरीय अडियो उपकरणको मागलाई उनले व्यवसायिक अवसरका रूपमा पहिचान गरे ।
उनका अनुसार हर्डको उक्त उत्पादनले अमेजनमा उल्लेखनीय बिक्री हासिल गरेको छ र केही समय बेस्ट सेलरको सूचीमा समेत परेको थियो । यसले लोजिटेक र डीजेआईजस्ता स्थापित ब्रान्डसँग प्रतिस्पर्धा गर्ने अवसर दिएको उनको भनाइ छ ।
सानो टिम र सीमित प्रारम्भिक लगानीबाट सुरु भएको कम्पनीले विश्व बजारमा स्थापित ब्रान्डसँग प्रतिस्पर्धा गर्न थालेपछि अजरको व्यवसायिक यात्राले थप ध्यान आकर्षित गरेको हो ।
‘फोर्ब्स ३० अन्डर ३०’ मा अजर
व्यवसाय विस्तारसँगै अजरको व्यक्तिगत उपलब्धि पनि अन्तर्राष्ट्रिय स्तरमा पुगेको छ । विश्वप्रसिद्ध व्यावसायिक म्यागजिन फोर्ब्सले उनलाई ‘३० अन्डर ३०’ सूचीमा समावेश गरेको छ ।
रिटेल तथा ई-कमर्स क्षेत्रमा प्रभाव पारिरहेका युवा उद्यमीलाई समेटिने उक्त सूचीमा पर्नु अजरका लागि मात्र नभई नेपाली मूलका युवाका लागि पनि उल्लेखनीय उपलब्धिका रूपमा हेरिएको छ ।
अब वालमार्टदेखि विश्व बजारसम्म
अजरको महत्वाकांक्षा भने यहाँ रोकिएको छैन । अमेजनबाट सुरु भएको आफ्नो व्यवसायलाई अब अमेरिकाका ठूला रिटेल नेटवर्कसम्म विस्तार गर्ने उनको योजना छ ।
वालमार्ट र टार्गेटजस्ता ठूला अमेरिकी रिटेलरमार्फत आफ्ना उत्पादनलाई व्यापक बजारमा पुर्याउने लक्ष्य उनले राखेका छन् । यसका लागि उत्पादनको गुणस्तर, ब्रान्ड निर्माण र प्रविधिको प्रयोगलाई प्राथमिकतामा राखिएको उनको भनाइ छ ।
उनको यात्रा हेर्दा एउटा कुरा स्पष्ट हुन्छ- आजको डिजिटल अर्थतन्त्रमा व्यवसाय सुरु गर्न विशाल कार्यालय, सयौँ कर्मचारी वा करोडौँको प्रारम्भिक लगानी अनिवार्य छैन । सही बजार पहिचान, प्रविधिको प्रयोग, उत्पादनमा निरन्तर सुधार र जोखिम लिन सक्ने साहसले सानो सुरुवातलाई ठूलो व्यवसायमा बदल्न सक्छ ।
