आईसीटी समाचार
काठमाडौं । चिनियाँ प्रविधि कम्पनी अलिबाबाले कृत्रिम बुद्धिमत्ता (एआई) प्रविधिमा लगानी विस्तार गर्न हङकङमा नयाँ शेयर निष्कासनमार्फत ठूलो रकम जुटाउने योजना अघि सारेको छ । कम्पनीले आइतबार सार्वजनिक गरेको जानकारीअनुसार नयाँ शेयर बिक्रीबाट करिब ८० अर्ब हङकङ डलर अर्थात् १०.२ अर्ब अमेरिकी डलर संकलन गर्ने लक्ष्य राखिएको छ ।
हङकङमा मुख्यालय रहेको अलिबाबाले पछिल्लो समय एआईलाई आफ्नो व्यवसाय विस्तारको प्रमुख आधार बनाउँदै आएको छ । कम्पनीले एआई पूर्वाधारदेखि आफ्नै मोडल तथा प्रविधिको विकाससम्म ठूलो लगानी गरिरहेको छ ।
कम्पनीका अनुसार नयाँ शेयर निष्कासनबाट प्राप्त हुने रकम अन्य क्षेत्रमा प्रयोग नगरी एआई पूर्वाधार विस्तार र ‘फुल–स्ट्याक एआई’ क्षमता विकासमा केन्द्रित गरिनेछ । अलिबाबाले आफ्नो विश्वव्यापी एआई नेतृत्वलाई थप बलियो बनाउने उद्देश्यले पूँजी जुटाउन लागेको जनाएको छ ।
एआईमा बढ्दो लगानीप्रति शेयरधनीको चासो
अलिबाबाले एआई क्षेत्रमा निरन्तर ठूलो लगानी गरिरहेपनि त्यसबाट कम्पनीले कति प्रतिफल हासिल गर्न सक्छ भन्ने विषयमा शेयरधनीहरूले चासो व्यक्त गर्दै आएका छन् । कम्पनीले भने विश्वभर एआई प्रविधिको माग तीव्र रूपमा बढिरहेकाले अहिलेको लगानीले भविष्यमा आफ्नो प्रविधिगत क्षमता र बजार उपस्थिति थप विस्तार गर्न सहयोग गर्ने विश्वास व्यक्त गरेको छ ।
त्रैमासिक आम्दानी २६९ अर्ब युआन
अलिबाबाले बिहीबार सार्वजनिक गरेको पछिल्लो त्रैमासिक वित्तीय विवरणअनुसार कम्पनीको राजस्व करिब २६९ अर्ब युआन पुगेको छ । यो रकम करिब ४० अर्ब अमेरिकी डलर बराबर हो । विश्व बजारमा एआई प्रविधिको प्रयोग बढ्दै जाँदा अलिबाबाका एआईसम्बन्धी उत्पादन तथा सेवाको माग पनि बढिरहेको कम्पनीले जनाएको छ ।
‘क्वेन’ एआई मोडलमा जोड
अलिबाबा आफ्नै खुला स्रोतको ‘क्वेन’ (Qwen) एआई मोडलका कारण पनि चर्चामा छ । कम्पनीका अनुसार क्वेन विश्वभरका विकासकर्ताबीच लोकप्रिय हुँदै गएको छ । नयाँ पूँजी परिचालनपछि अलिबाबाले एआई मोडलको विकास, कम्प्युटिङ पूर्वाधार तथा सम्बन्धित प्रविधिमा लगानी अझ बढाउने अपेक्षा गरिएको छ ।
एआई क्षेत्रमा अमेरिकी तथा चिनियाँ प्रविधि कम्पनीबीच प्रतिस्पर्धा तीव्र भइरहेका बेला अलिबाबाको यो कदमलाई आफ्नो एआई क्षमता विस्तार गर्ने ठूलो पूँजीगत प्रयास**का रूपमा हेरिएको छ ।
