आईसीटी समाचार
काठमाडौं । गुगल डिपमाइन्डले रोबोटलाई थप सक्षम बनाउने उद्देश्यले नयाँ कृत्रिम बुद्धिमत्ता (एआई) प्रणाली 'जेमिनी रोबोटिक्स २' सार्वजनिक गरेको छ । कम्पनीका अनुसार यो प्रविधिले रोबोटलाई विभिन्न शारीरिक कार्य स्वतन्त्र रूपमा गर्न सक्ने क्षमता प्रदान गर्छ ।
नयाँ प्रणालीमार्फत रोबोटले फोहोर उठाउने, पानी हाल्ने भाँडा समात्ने, बल्ब जडान गर्ने, फोहोरको झोला बाँध्ने तथा अन्य दैनिक कामहरू वास्तविक समयमा सम्पन्न गर्न सक्ने बताइएको छ । यसको क्षमताको प्रदर्शन गर्न कम्पनीले सार्वजनिक गरेको भिडियोमा रोबोटले बुमबक्समा क्यासेट राख्ने, बल्ब फेर्ने र फोहोरको झोला बाँध्ने जस्ता कार्य गरेको देखाइएको छ ।
गुगलका अनुसार अघिल्लो संस्करण जेमिनी रोबोटिक्सले रोबोटिक हातमार्फत सीमित तथा सूक्ष्म कार्यहरू गर्न सक्थ्यो । तर नयाँ संस्करणले रोबोटको सम्पूर्ण शरीरको गतिविधिलाई समन्वय गर्दै जटिल कामहरू पनि प्रभावकारी रूपमा सम्पन्न गर्न सक्ने बनाएको छ ।
कम्पनीले भिडियोमा देखाइएका सबै गतिविधि कुनै मानवीय हस्तक्षेपबिना पूर्ण रूपमा स्वायत्त रूपमा सञ्चालन भएको दाबी गरेको छ । यस सन्दर्भमा गुगलले टेस्लाको अप्टिमस रोबोटको प्रदर्शनसँग तुलना गर्दै त्यहाँ पहिले सार्वजनिक गरिएको एउटा प्रदर्शनमा रोबोटलाई मानिसले टाढाबाट नियन्त्रण गरेको तथ्य पछि खुलासा भएको उल्लेख गरेको छ ।
इन्ग्याजेटका अनुसार जेमिनी रोबोटिक्स २ मा बहु-स्तरीय एआई मोडेल प्रयोग गरिएको छ । यसमध्ये एउटा भिजन–ल्याङ्ग्वेज मोडेलले वरपरको वातावरण बुझ्ने काम गर्छ भने दुईवटा भिजन–ल्याङ्ग्वेज–एक्सन मोडेलले रोबोटको हात र शरीरको चाललाई नियन्त्रण गर्छ ।
गुगलले भने यो प्रविधिलाई सबै प्रकारका काम गर्न सक्ने सार्वभौमिक रोबोटका रूपमा लिन नहुने स्पष्ट पारेको छ । कम्पनीका अनुसार भिडियोमा देखाइएका प्रत्येक कार्यका लागि रोबोटलाई मानवद्वारा गरिएको प्रदर्शन, भिडियो नमुना र सिमुलेसनको आधारमा छुट्टाछुट्टै प्रशिक्षण दिइएको हो ।
गुगल डिपमाइन्डका अनुसार भविष्यमा मानिसले गर्ने अधिकांश शारीरिक कार्य गर्न सक्ने रोबोट विकास गर्ने दीर्घकालीन योजनातर्फ यो महत्वपूर्ण उपलब्धि हो । सुरक्षालाई प्राथमिकतामा राख्दै कम्पनीले प्रत्येक एआई तहमा सुरक्षा संयन्त्र समावेश गरेको जनाएको छ ।
साथै एएसआईएमओभी–एजेण्टिक नामक नयाँ सुरक्षा मापदण्ड पनि विकास गरिएको छ, जसले कुनै आदेश वा कार्यले जोखिमपूर्ण परिणाम निम्त्याउने सम्भावना छ वा छैन भन्ने मूल्याङ्कन गर्नेछ ।
गुगल डिपमाइन्डकी रोबोटिक्स प्रमुख क्यारोलिना पाराडाले वास्तविक वातावरणमा रोबोट सञ्चालन गर्दा धेरै अप्रत्याशित अवस्था आउन सक्ने भएकाले सुरक्षा अनुसन्धानलाई अझ प्राथमिकता दिइएको बताएकी छन् । यद्यपि गुगलले यस्ता रोबोट तत्काल उपभोक्ता बजारमा ल्याउने योजना नरहेको स्पष्ट पारेको छ।
उता, टेस्लाका प्रमुख कार्यकारी अधिकृत इलन मस्कले अप्टिमस रोबोट कम्पनीको सबैभन्दा ठूलो व्यवसाय बन्न सक्ने दाबी गर्दै यसबाट १० ट्रिलियन अमेरिकी डलरसम्मको बिक्री हुने अनुमान व्यक्त गरेका छन् ।
उनले सन् २०२६ सम्म ५० हजारदेखि एक लाख रोबोट उत्पादन गर्ने तथा त्यसअघि नै आफ्ना कारखानामा एक हजार अप्टिमस रोबोट सञ्चालनमा ल्याउने लक्ष्य सार्वजनिक गरेका भएपनि ती लक्ष्य हालसम्म पूरा हुन सकेका छैनन् ।
