आईसीटी समाचार
काठमाडौं । कोशी प्रदेश सरकारले आगामी आर्थिक वर्ष २०८३/८४ मा सामुदायिक विद्यालयमा अध्ययनरत छात्राहरूलाई लक्षित गर्दै ‘सक्षम छोरी कार्यक्रम’ सञ्चालन गर्ने भएको छ ।
सोमबार प्रदेश सभामा बजेट प्रस्तुत गर्दै आर्थिक मामिला तथा योजना मन्त्री विदूरकुमार लिङ्थेपले बालिका शिक्षालाई सशक्त बनाउँदै क्षमता विकास, अवसर विस्तार र सामाजिक सशक्तिकरणलाई केन्द्रमा राखेर कार्यक्रम अघि सारिएको बताए ।
उक्त कार्यक्रमका लागि प्रदेश सरकारले ७ करोड रुपैयाँ विनियोजन गरेको छ । सरकारका अनुसार यो कार्यक्रममार्फत प्रदेशभरका सामुदायिक विद्यालयमा अध्ययनरत करिब २ लाख ७५ हजार छात्रा प्रत्यक्ष रूपमा लाभान्वित हुनेछन् ।
कार्यक्रमले छात्राहरूको शैक्षिक पहुँच विस्तार गर्नुका साथै उनीहरूको आत्मविश्वास, सीप विकास र आत्मनिर्भरता बढाउने उद्देश्य राखेको छ ।
यसैबीच, कोशी प्रदेश सरकारले शिक्षण सिकाइ प्रक्रियालाई प्रविधिमैत्री बनाउन १०० वटा सामुदायिक विद्यालयमा डिजिटल बोर्ड जडान गर्ने योजना अघि सारेको छ । यसका लागि १० करोड रुपैयाँ विनियोजन गरिएको छ ।
डिजिटल प्रविधिको प्रयोगले कक्षा कोठाको शिक्षण पद्धतिलाई आधुनिक, अन्तरक्रियात्मक र प्रभावकारी बनाउने अपेक्षा गरिएको छ ।
शिक्षा तथा खेलकुद क्षेत्रका लागि समग्रमा ३ अर्ब १० करोड रुपैयाँ विनियोजन गरिएको प्रदेश सरकारले जनाएको छ । यसलाई मानव संसाधन विकास र दीर्घकालीन सामाजिक–आर्थिक रूपान्तरणको आधारका रूपमा लिइएको छ ।
सरकारका अनुसार शिक्षा क्षेत्रमा गरिएको लगानीले लैङ्गिक समानता, समावेशीकरण र प्रदेशको समग्र विकासलाई थप मजबुत बनाउने विश्वास गरिएको छ ।
