आईसीटी समाचार
काठमाडौं । माध्यमिक शिक्षा परीक्षा (एसईई) उत्तीर्ण विद्यार्थीलाई लक्षित गर्दै नेपाल टेलिकमले विशेष ‘एनटी एसईई अफर’ सार्वजनिक गरेको छ । अफरअन्तर्गत विद्यार्थीहरूले मात्र २० रुपैयाँमा प्रिपेड सिमकार्ड प्राप्त गर्नुका साथै ९ रुपैयाँ ८० पैसा ब्यालेन्ससमेत पाउनेछन् ।
नेपाल टेलिकमका अनुसार अफरमा सहभागी ग्राहकले ३० दिनसम्म दैनिक २० मिनेट नेपाल टेलिकम नेटवर्कभित्र (एनटी–एनटी) भ्वाइस कल, ५०० एमबी डेटा तथा १० वटा एसएमएस सुविधा प्राप्त गर्नेछन् ।
टेलिकमले अफरअन्तर्गत रिचार्जमा थप बोनस सुविधासमेत उपलब्ध गराएको जनाएको छ । ५० रुपैयाँ वा सोभन्दा बढी रकमको रिचार्ज गर्दा ग्राहकले तीन दिनसम्म प्रयोग गर्न मिल्ने ५०० एमबी बोनस डेटा, ५० मिनेट एनटी-एनटी भ्वाइस कल तथा ५० वटा बोनस एसएमएस प्राप्त गर्नेछन् ।
एसईई परीक्षा उत्तीर्ण विद्यार्थीलाई सहज र सुलभ सञ्चार सेवा उपलब्ध गराउने उद्देश्यले यो योजना ल्याइएको नेपाल टेलिकमले जनाएको छ । कम्पनीले अफरसम्बन्धी थप जानकारीका लागि १४९८ मा सम्पर्क गर्न आग्रह गरेको छ ।
