गुगल वालेटमा नयाँ फीचर : अब होम स्क्रिनमै उडान ट्र्याक गर्न सकिने

काठमाडौं । गुगलले आफ्नो डिजिटल भुक्तानी तथा सेवा प्लेटफर्म गुगल वालेट (Google Wallet) मा नयाँ सुविधा थप गरेको छ, जसअनुसार अब प्रयोगकर्ताले आफ्नो स्मार्टफोनको होम स्क्रिनमै उडानको प्रत्यक्ष (लाइभ) अपडेट ट्र्याक गर्न सक्नेछन् ।

गत वर्ष अक्टोबरमै कम्पनीले एन्ड्रोइड प्रयोगकर्ताका लागि यस्तो सुविधा ल्याउने घोषणा गरेको थियो, र अहिले उक्त सुविधा औपचारिक रूपमा उपलब्ध गराइएको हो । यसअन्तर्गत, प्रयोगकर्ताले यदि वालेटमा आफ्नो बोर्डिङ पास पहिले नै थप गरेका छन् भने उडान सम्बन्धी महत्वपूर्ण जानकारीहरू स्वत: होम स्क्रिनमा देखिनेछन् ।

यसमा बोर्डिङ समय, गेट परिवर्तन लगायतका अद्यावधिकहरू निरन्तर नोटिफिकेसन मार्फत उपलब्ध हुनेछन् । साथै, यदि प्रयोगकर्ताले आफ्नो उडानको बोर्डिङ पास वालेटमा थपेका छैनन् भने पनि जिमेल (Gmail) सँगको एकीकरणमार्फत चेक-इन गर्न सम्झाउने सूचना प्राप्त हुनेछ ।

नयाँ सुविधा Android 16 मा समेत उपलब्ध हुने बताइएको छ । उडान प्रस्थान हुनुअघि सक्रिय हुने यो प्रणालीले प्रयोगकर्तालाई अनुमानित आगमन समय, उडानको अवधि तथा यात्राको प्रगति (प्रोग्रेस बार) जस्ता विवरण देखाउनेछ । उक्त नोटिफिकेसनमा क्लिक गर्दा प्रयोगकर्ता गुगल फ्लाइट्सको लिंकसहितको विस्तृत टिकट पृष्ठमा पुग्नेछन्, जहाँ थप जानकारी हेर्न सकिनेछ ।