आईसीटी समाचार
काठमाडौं । चिनियाँ स्मार्टफोन निर्माता नुबियाले नयाँ फ्ल्यागसिप स्मार्टफोन बजारमा ल्याउने तयारी गरेको छ । कम्पनीले ‘नुबिया नाभिक्स अल्ट्रा’ नामको यो फोन आगामी १६ सेप्टेम्बरमा चीनमा सार्वजनिक गर्ने तयारी गरेको हो ।
नयाँ फोनलाई नुबियाले एआई प्रविधिलाई केन्द्रमा राखेर विकास गरेको जनाएको छ । कम्पनीका अनुसार यो ठूलो परिमाणमा उत्पादन हुने पहिलो ‘एआई एजेन्ट’ स्मार्टफोनमध्ये एक हुनेछ । फोनमा बाइटडान्ससँगको सहकार्यमा विकसित ‘डोउबाओ’ एआई मोबाइल असिस्टेन्ट उपलब्ध हुने अपेक्षा गरिएको छ ।
प्रोसेसिङका लागि फोनमा क्वालकमको नयाँ ‘स्न्यापड्रागन ८ एलिट जेन ५’ चिपसेट प्रयोग हुनेछ । उच्च क्षमताको प्रदर्शनसँगै लामो समयसम्म ब्याट्री टिकाउन ७,१०० एमएएच क्षमताको सिलिकन–कार्बन ब्याट्री राखिएको छ । यसले वायर्ड र वायरलेस दुवै चार्जिङ प्रविधि समर्थन गर्ने बताइएको छ ।
क्यामरामा पनि विशेष ध्यान
नाभिक्स अल्ट्रामा ट्रिपल रियर क्यामरा प्रणाली हुनेछ । मुख्य क्यामरा ५० मेगापिक्सेलको हुनेछ भने त्यससँग अल्ट्रा–वाइड र पेरिस्कोप टेलिफोटो लेन्स जोडिनेछन् । सेल्फी तथा भिडियो कलका लागि पनि ५० मेगापिक्सेलको फ्रन्ट क्यामरा दिइने अपेक्षा गरिएको छ ।
फोनको पछाडिको क्यामरा मोड्युल ‘पिल’ आकारको डिजाइनमा रहनेछ । त्यसको तल फ्ल्यास राखिएको छ । अगाडिको भागमा भने सेल्फी क्यामराका लागि होल–पन्च कटआउट प्रयोग गरिएको छ ।
१४४ हर्ज रिफ्रेस रेट भएको डिस्प्ले
फोनमा बीओईले निर्माण गरेको ६.७८ इन्चको फ्ल्याट डिस्प्ले प्रयोग हुने बताइएको छ । डिस्प्लेले १.५के रिजोल्युसन र १४४ हर्ज रिफ्रेस रेट सपोर्ट गर्ने अपेक्षा गरिएको छ ।
नुबियाले फोनको मेमोरीका लागि चाङसिन मेमोरी टेक्नोलोजीजका कम्पोनेन्ट प्रयोग गर्ने तयारी गरेको छ । यस्तो मेमोरी प्रयोग गर्ने ठूलो परिमाणमा उत्पादन हुने पहिलो स्मार्टफोन हुने दाबी पनि गरिएको छ ।
एआईका लागि छुट्टै बटन
नाभिक्स अल्ट्राको डिजाइनमा अर्को आकर्षक पक्ष सुन्तला रङको साइड बटन हो । नुबियाले यसको कामबारे पूर्ण जानकारी सार्वजनिक गरिसकेको छैन । तर, यो बटन एआईसँग सम्बन्धित सुविधा छिटो प्रयोग गर्नका लागि प्रयोग हुन सक्ने अनुमान गरिएको छ ।
फोन सेतो, गुलाबी, बैजनी र कालो गरी विभिन्न रङमा उपलब्ध हुने सम्भावना छ । समग्रमा नुबियाले नयाँ फोनमार्फत उच्च प्रदर्शन, ठूलो ब्याट्री र अन–डिभाइस एआई क्षमतालाई एउटै डिभाइसमा जोड्ने प्रयास गरेको देखिन्छ ।
