आईसीटी समाचार
काठमाडौं । स्मार्टफोन निर्माता कम्पनीहरूले राजस्व र मार्केटिङका लागि फोनमा धेरै एप्स पहिले नै इन्स्टल गरेर दिन्छन्, जसलाई ब्लोटवेयर भनिन्छ । यी एप्स ब्याकग्राउन्डमा चलिरहन्छन्, ब्याट्री खपत गर्छन् र अनावश्यक नोटिफिकेसन पठाउँछन् । ब्लोटवेयरलाई जङ्कवेयर पनि भनिन्छ ।
यी त्यस्ता एप्स हुन्, जुन फोन निर्माता कम्पनी वा सर्भिस प्रोभाइडरको तर्फबाट पहिले नै प्री-इन्स्टल भएर आउँछन् । यिनमध्ये धेरैजसो एप्स हाम्रो कुनै कामका हुँदैनन्, तर यी चुपचाप तपाईंको फोनका रिसोर्सेज प्रयोग गरिरहन्छन् । परिणामस्वरूप तपाईंको नयाँ र महँगो फोन पनि केही समयमै ह्याङ हुन थाल्छ ।
ब्लोटवेयरले के हानि गर्छ ?
यी साना-साना एप्स मिलेर पछि ठूलो समस्या बनाउँछन् । जस्तै:
- फोनको स्टोरेज भरिनु ।
- ब्याकग्राउन्डमा चलेर र्याम र ब्याट्री खपत गर्नु ।
- बारम्बार नचाहिएका नोटिफिकेसन पठाउनु ।
- बिस्तारै फोनलाई स्लो बनाउनु ।
नचाहिएका एप्स कसरी हटाउने ?
यदि तपाईं आफ्नो एन्ड्रोइड फोनबाट यी एप्स हटाउन चाहनुहुन्छ भने, यी सजिला स्टेप्स पालना गर्नुहोस्...
सबैभन्दा पहिले आफ्नो फोनको सेटिङ्समा जानुहोस् । तलतिर स्क्रोल गर्नुहोस् र एप्स सेक्शनमा जानुहोस् ।
यहाँ तपाईंलाई See All Apps भन्ने विकल्प देखिन्छ, त्यसमा ट्याप गरेर पूरा लिस्ट खोल्नुहोस् ।
अब तपाईंले हटाउन चाहेको एप छान्नुहोस् । यदि त्यो एप डिलिट गर्न सकिन्छ भने, तपाईंलाई अनइन्स्टल बटन देखिन्छ, त्यसमा क्लिक गर्नुहोस् ।
प्रक्रिया पूरा भएपछि एकपटक फोनलाई रिस्टार्ट गर्न नबिर्सनुहोस्, ताकि ब्याकग्राउन्ड प्रोसेसेज बन्द होऊन् ।
एप डिलिट हुन सकेन भने के गर्ने ?
केही एप्स सिस्टम-लक्ड हुन्छन्, जसलाई पूर्ण रूपमा डिलिट गर्न मिल्दैन । यस्तो अवस्थामा तपाईंले तिनलाई डिसेबल गर्न सक्नुहुन्छ:
सेटिङ्सको एप्स सेक्शनमा गएर तपाईंले हटाउन चाहेको एप छान्नुहोस् । त्यहाँ तपाईंलाई अनइन्स्टलको सट्टा डिसेबल बटन देखिन्छ । त्यसमा ट्याप गर्नुहोस् ।
कन्फर्म गरेपछि यो एप तपाईंको स्क्रिनबाट गायब हुनेछ र ब्याकग्राउन्डमा डेटा वा ब्याट्री खर्च गर्न बन्द गर्नेछ ।
