समाचार

‘फेयर डिजिटल फाइनान्स’ नारासहित विश्व उपभोक्ता अधिकार दिवस मनाइदै

बुधबार, ५ माघ, २०७८

यस वर्षको विश्व उपभोक्ता अधिकार दिवसको नारा फेयर डिजिटल फाइनान्स (निष्पक्ष डिजिटल वित्त) तय भएको छ । हरेक वर्ष मार्च १५ मा मनाइने गरेकोे विश्व उपभोक्ता अधिकार दिवसको यो वर्षको थिम निष्पक्ष डिजिटल वित्त तय भएको हो । यो थिम गैर नाफामूलक संस्था कन्जुमर इन्टरनेशनलले घोषणा गरेको हो ।

यस दिवसमा विश्वव्यापी रुपमा उपभोक्ता अधिकारका बारेमा चेतनामूलक कार्यक्रम, उपभोक्ता संरक्षण र सशक्तिकरणको विषयहरुलाई उठान गर्ने गरिन्छ । यस वर्ष पनि विगतका वर्ष जस्तै कार्यक्रमहरु गर्न कन्जुमर इन्टरनेशनलले सहकार्य गर्ने भएको छ ।

कन्जुमर इन्टरनेशनलले सय भन्दा बढि देश र २०० उपभोक्ता एडभोकेशी सदस्यहरुसँग सहकार्य गरेर यस दिवसलाई अविस्मरणीय बनाउन काममा लागिपरेको छ । गत वर्ष प्लास्टिक प्रदुषण हटाउनका लागि संस्थाले काम गरेको थियो ।

यस थिमले विश्वभरिका उपभोक्ताका लागि निष्पक्षीय डिजिटल वित्तको स्थापना गर्ने माग गरेको हो । यस पहलले डिजिटल वित्तलाई कसरी सुरक्षित, निजी, दिगो र समावेशी बनाउने भन्ने विषयहरुमा छलफल गर्न र निष्कर्ष निकाल्न सकिन्छ भनेर संस्थाको विश्वास रहेको छ । विश्व उपभोक्ता अधिकार दिवसले विश्वव्यापी रुपमा महत्वपूर्ण विषयहरुको उठान र छलफल गर्ने वातावरण बनाइदिने पनि देखिन्छ ।