समाचार

आविष्कार केन्द्रमा बनेको बेबी वार्मरले अमेरिकामा जित्यो पिपुल्स च्वाइस अवार्ड

शुक्रबार, ६ साउन, २०७९

राष्ट्रिय आविष्कार केन्द्रमा बनेको बायो मेडिकल उपकरणले अमेरिकामा पिपुल्स च्वाइस अवार्ड जितेको छ । केन्द्रमा बनेको ‘न्यानो नानी’ नाम दिइएको बेबी वार्मरले पिपुल्स च्वाइस पुरस्कार जितेको हो ।

गत बर्षदेखि अमेरिकाको नर्थइस्ट ओहियो मेडिकल युनिभर्सिटीसँग राष्ट्रिय आविष्कार केन्द्रले बायो-मेडिकल बिषयमा सहकार्य गरिरहेको छ । उक्त विश्वविद्यालयले बायो-मेडिकल उपकरणहरुको ईनोभेसन सम्बन्धि एउटा प्रदर्शनी राखेको थियो र आविष्कार केन्द्रलाई पनि निमन्त्रणा गरेको थियो ।

त्यसको लागि आविष्कार केन्द्रमा बनेको न्यानो नानी कोर्गोद्वारा प्रर्दशनीका लागि पठाईएको थियो । सो प्रदर्शनीमा भाग लिन र प्रदर्शनी पछि एक महिने तालिम पनि दिन भनेर विश्वविद्यालयले केन्द्रका तीन जना ईन्जिनियरलाई निमन्त्रणा गरेको थियो ।

तर विश्वविद्यालयले निम्ता गरेको भएपनि नेपालमा रहेको अमेरिकी दुताबासले उनीहरुलाई भिसा दिएन र उनीहरू उक्त प्रदर्शनीमा भाग लिन पाएनन् । अनततः ३ जना इन्जिनियरहरुले जुमबाटै भाग लिन बाध्य भएका थिए ।

सो प्रदर्शनीमा आविष्कार केन्द्रका संस्थापक महावीर पुन पनि पुगेका थिए । बेबी वार्मर बारे सो विश्वविद्यालयका विद्यार्थीहरुले अवलोकनकर्तालाई उपकरणको बारेमा बनाइएको पर्चाहरु बाँड्न मदत गरेको पुनले जानकारी दिए ।