छिमेक लघुवित्त वित्तीय संस्था लिमिटेडका सदस्यहरूले अबदेखि आफ्नो किस्ता तथा बचत ईसेवाबाट भुक्तानी गर्न सक्ने भएका छन् ।

विभिन्न क्षेत्रलाई डिजिटल भुक्तानीमा आवद्ध गर्दै लगेको इसेवाले ग्रामिण भेगमा रहेका लघुउद्यमीहरुलाई पनि डिजिटल भुक्तानी गर्न सकिने गरी सेवा सुरू गरेको हो ।

अनलाइन भुक्तानी सम्बन्धि सम्झौतापत्रमा ईसेवाका तर्फबाट प्रमुख कार्यकारी अधिकृत सुभास सापकोटा र छिमेक लघुवित्तका तर्फबाट चोलराज शर्मा जोशीले हस्ताक्षर गरेका थिए ।

ईसेवा अकाउन्ट भएका सदस्यहरूले आफ्नो मोबाईलबाटै नियमित किस्ता तथा बचतको रकम भुक्तानी गर्न सक्नेछन् भने ईसेवा एकाउन्ट नभएका सदस्यले नजिकको ईसेवा जोन, पोइन्ट तथा ईसेवा अंकित एजेन्टबाट भुक्तानी गर्न सक्नेछन् ।

यो सँगै लघुवित्तका सदस्यहरुले ऋणको किस्ता तिर्न नगद बोकेर लघुवित्तको कार्यालय पुग्नुपर्ने समयको बचत हुनुको साथै अन्य खर्चमा समेत कटौती हुनेछ ।

लघुवित्तको अनलाइन भुक्तानीबारे ईसेवाका प्रमुख कार्यकारी अधिकृत सुभास सापकोटाले भने ‘ग्रामिण क्षेत्रमा रहेका लघु उद्यमीहरूलाई लघुवित्त संस्थाहरूले निकै राम्रो सेवा दिइरहेको छ । यस्तो अवस्थामा लघुउद्यमीहरूमा पनि डिजिटल भुक्तानीको सुविधा अत्यावश्यक थियो । हाम्रो सहकार्यले अब लघुउद्यमीहरूलाई अनलाइनबाट भुक्तानी गर्न सहज बनाउनेछ र उहाँहरूले घरबाटै बचत गर्न तथा किस्ता तिर्न सक्नुहुनेछ ’।

आफ्ना सदस्यलाई अनलाइन भुक्तानीको सुविधा दिन सुरू गरिएकोबारे छिमेक लघुवित्तका प्रमुख कार्यकारी अधिकृत चोलराज शर्मा जोशीले भने ‘अहिलेको डिजिटलाईजेसनको जमानामा क्यासलेस कारोबारका लागि इसेवासँगको सहकार्यले निकै फाइदा पुर्याउनेछ । सदस्यहरूले घरबाटै कारोबार गर्न सक्नेभएपछि उनीहरूको समय र यातायात खर्च पनि बचत हुने भयो । भिडभाडमा जान नपर्ने भएपछि कोरोना जस्ता संक्रात्मक रोगबाट हुने जोखिम पनि न्यूनिकरण हुनेभयो । यस किसिमको डिजिटल भुक्तानीबाट संस्थाको लागत पनि घटाउने भएकाले डिजिटल भुक्तानीले सबैलाई सहज बनाउनेछ ’।

ईसेवा नेपालको पहिलो भुक्तानी सेवा प्रदायक कम्पनी हो । ईसेवा मार्फत मोबाईल, टेलिफोन, इन्टरनेट, बिजुली तथा खानेपानीको महशुल भुक्तानी, रिचार्ज, हवाइजहाज, बसको टिकट, स्कुल कलेजको शुल्क लगायतका दुई हजार भन्दा बढी सेवाहरूको शुल्क भुक्तानी गर्न सकिन्छ ।

ईसेवामा हाल ४९ वटा बैंक तथा वित्तीय संस्था सदस्य रहेका छन् । यी बैंकबाट ईसेवामा सहजै रकम जम्मा गर्न तथा ईसेवाबाट बैंक खातामा रकम पठाउन सकिन्छ ।

छिमेक लघुवित्त वित्तीय संस्था नेपालको अग्रणी लघुवित्त संस्था हो । १ सय ३७ वटा शाखा तथा डीजिटल कार्यालय मार्फत ३ लाख ७३ हजार भन्दा धेरै सदस्यलाई सेवा प्रदान गर्दै आएको छ ।

हाल संस्थाले करिब २० अर्ब १२ करोड रूपैयाँ कर्जा लगानी गरेको छ भने बचत १८ अर्ब भन्दा धेरै रहेको छ । संस्थाले क्यासलेस अर्थतन्त्रलाई आत्मसाथ गर्दै डिजिटल बैंकिङका लागि विभिन्न सेवा उपलब्ध गराउँदै आएको छ ।