काठमाडौं । सामाजिक सञ्जालको दुनियाँमा बालबालिका र टिनएजर्सको सुरक्षालाई लिएर सधैँ प्रश्न उठ्ने गरेको छ । धेरै देशहरूले त १६ वर्षभन्दा कम उमेरका बालबालिकाका लागि सामाजिक सञ्जालसमेत प्रतिबन्ध लगाएका छन् । यही कुरालाई ध्यानमा राख्दै स्न्यापच्याटले १३ देखि १५ वर्ष उमेर समूहका प्रयोगकर्ताका लागि एक ठूलो प्राइभेसी-फोकस्ड अपडेट सार्वजनिक गरेको छ । आउनुहोस्, यो नयाँ फीचर के हो ? र यसमा अभिभावकहरूका लागि के-कस्ता विशेष नियन्त्रण दिइएका छन्, बुझौं ।

स्न्यापच्याट फ्रेन्ड्स-ओनली प्रोफाइल

किशोर प्रयोगकर्ताको अनलाइन सुरक्षा अझ बलियो बनाउन स्न्यापच्याटले ठूलो कदम चालेको छ । कम्पनीले अब १३ देखि १५ वर्षका प्रयोगकर्ताका लागि नयाँ फ्रेन्ड्स-ओनली प्रोफाइल अनुभव ल्याएको छ, जसले गर्दा उनीहरूको स्टोरी र स्पटलाइट भिडियोहरू केवल उनीहरूले आफैँ साथीका रूपमा स्वीकार गरेका मानिसहरूले मात्र हेर्न पाउनेछन् । यो फिचर विश्वभर रोलआउट भइसकेको छ ।

अब सामाग्री केवल साथीहरूसम्म सीमित रहनेछ

स्न्यापच्याटको यो नयाँ अपडेटपछि १३ देखि १५ वर्ष उमेरका प्रयोगकर्ताले आफ्नो स्टोरी र स्पटलाइट भिडियो बनाउन, सुरक्षित गर्न र प्रोफाइलमा देखाउन सक्नेछन् । तर उनीहरूको सामा​​​​​​​ग्री केवल पारस्परिक रूपमा थपिएका साथीहरूले मात्र हेर्न पाउनेछन्।

पहिले यो उमेर समूहका प्रयोगकर्ताले स्पटलाइटमा भिडियो अपलोड त गर्न सक्थे, तर उनीहरूको सामग्री प्रोफाइलसँग जोडिएको हुँदैनथ्यो । अब उनीहरूलाई आफ्नै प्रोफाइल त मिल्नेछ, तर उनीहरूको पोस्ट साथीहरूको घेराभन्दा बाहिर जानेछैन ।

यो परिवर्तन किन ल्याइयो ?

स्न्यापच्याटका अनुसार, यो फिचरले युवाहरूलाई सुरक्षित वातावरणमा आफ्ना सिर्जनात्मकता र आत्म-अभिव्यक्ति देखाउने मौका दिनेछ । कम्पनीको भनाइ छ कि कम उमेरका प्रयोगकर्ताले सामाजिक सञ्जालमा सार्वजनिक प्रदर्शनभन्दा आफ्ना वास्तविक साथीहरूसँग सामाग्री साझा गरून् ।

यही कारणले नयाँ प्रणालीमा फोलोअर्स वा सम्पूर्ण स्न्यापच्याट समुदायको सट्टा केवल साथीहरूलाई मात्र सामा​​​​​​​ग्री देखाइनेछ ।

पब्लिक लाइक्स र एंगेजमेन्ट पनि देखिने छैनन्

नयाँ व्यवस्थाअनुसार १६ वर्षभन्दा कम उमेरका प्रयोगकर्ताले आफ्नो सामग्रीमा प्राप्त हुने सार्वजनिक एंगेजमेन्ट मेट्रिक्स पनि देख्न पाउने छैनन् । अर्थात् फेभरेट काउन्ट र अन्य सार्वजनिक तथ्याङ्क उनीहरूको प्रोफाइलमा देखिने छैनन् ।

यसको उद्देश्य सामाजिक स्वीकृतिको दबाब कम गर्नु र राम्रो डिजिटल अनुभव दिनु हो ।

उमेरअनुसार अलग-अलग नियम

स्न्यापच्याटले आफ्नो एज-एप्रोप्रियेट डिजाइन अन्तर्गत प्रयोगकर्ताको उमेरका आधारमा सामा​​​​​​​ग्री साझा गर्ने विभिन्न तह तय गरेको छ ।

१३ देखि १५ वर्ष

यस उमेरका बालबालिकाले पूर्ण रूपमा फ्रेन्ड्स-ओनली शेयरिङ फीचरको लाभ पाउनेछन्, जहाँ कुनै बाहिरी व्यक्तिले हस्तक्षेप गर्न सक्दैन ।

१६ देखि १७ वर्ष

यस उमेरमा प्रयोगकर्ताले अप्सनल पब्लिक शेयरिङ फीचर पाउनेछन्, तर त्यो पनि अतिरिक्त सुरक्षा, सीमित वितरण र अभिभावकीय दृश्यता उपकरणहरूको कडा निगरानीमा हुनेछ ।

१८ वर्षभन्दा माथि

१७ वर्षपछि प्रयोगकर्तालाई पूर्ण रूपमा पब्लिक प्रोफाइल र ब्रड डिस्ट्रीब्युशनका सबै फिचरहरू खुला गरिनेछन् ।

यी प्रयोगकर्ताका लागि पहिलेदेखि नै सुरक्षा नियम लागू

स्न्यापच्याटले जानकारी दिएको छ कि १८ वर्षभन्दा कम उमेरका प्रयोगकर्ताका लागि पहिले नै धेरै सुरक्षा उपाय लागू छन् । तीमध्ये कडा डिफल्ट प्राइभेसी सेटिङ्स, अपरिचित व्यक्तिबाट सम्पर्कमा रोक, शंकास्पद अकाउन्टहरूका लागि चेतावनी र मोडरेटेड पब्लिक कन्टेन्ट अनुभव समावेश छन् ।

अभिभावकहरूले कसरी नियन्त्रण गर्न सक्नेछन् ?

स्न्यापच्याटको फ्यामिली सेन्टर फीचरमार्फत अभिभावकहरूले बच्चाहरूको अनलाइन गतिविधिमा नजर राख्न सक्ने सुविधा पाएका छन् । यसअन्तर्गत अभिभावकले बच्चाहरूको फ्रेन्ड लिस्ट हेर्न, हालका कन्ट्याक्टहरूको जानकारी लिन, कन्टेन्ट रिस्ट्रिक्शन सेट गर्न, माइ एआई च्याटबोट बन्द गर्न, लोकेशन शेयरिङ व्यवस्थापन गर्न र शंकास्पद अकाउन्ट रिपोर्ट गर्न सक्नेछन् ।