आईसीटी समाचार
काठमाडौं । नेपालका लागि बजाज मोटरसाइकलको आधिकारिक वितरक हंसराज हुलासचन्द एन्ड कम्पनी प्रा.लि.ले दशैंलाई लक्षित गर्दै ‘बजाज गेम अफ पावर–खेल्ने हो ?’ अभियान सार्वजनिक गरेको छ ।
अभियानअन्तर्गत बजाजका ग्राहक तथा मोटरसाइकल प्रेमीहरूले मोटरसाइकल खरिदसँगै पुरस्कार जित्ने, डिजिटल रेसमा सहभागी हुने तथा आफ्ना मनपर्ने च्याम्पियनसँग प्रत्यक्ष भेट गर्ने अवसर पाउने कम्पनीले जनाएको छ ।
कम्पनीका अनुसार दशैंको अवसरमा बजाज मोटरसाइकल खरिद गर्ने ग्राहकले १ लाख रुपैयाँसम्मको पुरस्कार जित्न सक्नेछन् । साथै स्मार्ट घडी, हस्ताक्षरित सामाग्री तथा बजाजका विशेष उपहार समेत जित्ने अवसर रहनेछ ।
अभियानको प्रमुख आकर्षणका रूपमा रविन्द्र ढाँट, सीआर७ होराआ (सन्जन गौतम) र दीपेन्द्रसिंह ऐरीसँग भेट्ने अवसर राखिएको छ । अभियानअन्तर्गत छनोट भएका विजेताले उनीहरूसँग प्रत्यक्ष भेटघाट गर्न पाउनेछन् ।
डिजिटल ‘पल्सर रेसिङ गेम’ पनि
बजाजले अभियानलाई डिजिटल माध्यमसँग जोड्दै ‘पल्सर रेसिङ गेम’ समेत ल्याएको छ । यसमा सहभागीले आफूलाई मनपर्ने च्याम्पियनको पात्र छनोट गरी डिजिटल ट्र्याकमा रेस गर्न सक्नेछन् ।
सबैभन्दा कम समयमा रेस पूरा गर्ने तथा उत्कृष्ट प्रदर्शन गर्ने सहभागीले हस्ताक्षरित टी–सर्ट, च्याम्पियनका सामाग्री तथा बजाजका विशेष उपहार जित्न सक्ने कम्पनीले जनाएको छ ।
युवापुस्तामा डिजिटल माध्यमको बढ्दो प्रयोगलाई ध्यानमा राख्दै अभियानमा विभिन्न सहभागितामूलक गतिविधि समेटिएको कम्पनीको भनाइ छ । यसले ग्राहक तथा युवालाई बजाज ब्रान्डसँग थप नजिक जोड्ने अपेक्षा कम्पनीले गरेको छ ।
‘शो योर पावर’ च्यालेन्ज
अभियानअन्तर्गत ‘शो योर पावर’ च्यालेन्ज समेत सञ्चालन हुनेछ । यसमा राइडर तथा मोटरसाइकल प्रेमीहरूले आफ्नो शक्ति, फिटनेस र पल्सरप्रतिको लगावलाई सिर्जनात्मक शैलीमा प्रस्तुत गर्दै सहभागिता जनाउन सक्नेछन् ।
उक्त च्यालेन्जबाट छनोट भएका विजेताले पनि च्याम्पियनहरूसँग भेट्ने अवसर पाउने कम्पनीले जनाएको छ । गोल्छा ग्रुपका निर्देशक अभिमन्यु गोल्छाले दशैंको उत्साहलाई मोटरसाइकल खरिदसँगै नयाँ अनुभवसँग जोड्ने उद्देश्यले ‘गेम अफ पावर’ अभियान ल्याइएको बताए ।
उनका अनुसार पुरस्कार, डिजिटल रेस तथा च्याम्पियनसँगको भेटघाटमार्फत ग्राहकलाई सक्रिय सहभागिताको अवसर दिने गरी अभियान डिजाइन गरिएको हो ।
कम्पनीले ‘बजाज गेम अफ पावर–खेल्ने हो ?’ अभियानमार्फत यस वर्षको दशैंमा मोटरसाइकल खरिदलाई पुरस्कार, प्रतिस्पर्धा र विशेष अनुभवसँग जोडेर थप उत्साहपूर्ण बनाउने जनाएको छ ।
