आईसीटी समाचार
पोखरा । पोखरा महानगरपालिकाले कक्षा ११ मा छात्रवृत्तिमार्फत अध्ययन गर्न इच्छुक विद्यार्थीहरूबाट आवेदन आह्वान गरेको छ । महानगरपालिकाको शिक्षा महाशाखाले सूचना जारी गर्दै शैक्षिक सत्र २०८२ का लागि संस्थागत विद्यालयहरूमा लक्षित वर्गअन्तर्गत छात्रवृत्ति कोटामा भर्ना प्रक्रिया सुरू गरिएको जनाएको हो ।
महानगरपालिकाले जारी गरेको सूचनाअनुसार पोखरा महानगरभित्रका संस्थागत विद्यालयमा कक्षा ११ मा अध्ययन गर्न चाहने नेपाल राज्यभित्रका विद्यार्थीहरूले जेठ १ गतेदेखि जेठ ६ गतेसम्म आवेदन दिन सक्नेछन् । आवेदन शिक्षा महाशाखा, पोखरा १७ मा आवश्यक कागजातसहित पेश गर्नुपर्ने उल्लेख गरिएको छ ।
छात्रवृत्तिका लागि दलित, जनजाति, विपन्न, द्वन्द्वपीडित, सहिद परिवार, बेपत्ता परिवार, जनआन्दोलन घाइते परिवारलगायत लक्षित वर्गका विद्यार्थीहरू आवेदन दिन योग्य हुनेछन् ।
आवेदनसँगै एसईई उत्तीर्ण ग्रेडसिटको प्रतिलिपि, सम्बन्धित निकायको सिफारिस पत्र, वडा कार्यालयबाट प्रमाणित नाता प्रमाणपत्र तथा आवश्यक अन्य प्रमाणपत्र पेश गर्नुपर्ने व्यवस्था गरिएको छ ।
महानगरपालिकाले आवेदन फारम pokharamun.gov.np बाट डाउनलोड गर्न सकिने जनाएको छ । छात्रवृत्ति कार्यक्रममार्फत आर्थिक रूपमा कमजोर तथा लक्षित वर्गका विद्यार्थीलाई उच्च शिक्षामा पहुँच विस्तार गर्ने उद्देश्य राखिएको शिक्षा महाशाखाले जनाएको छ ।
